ԵՐԵՎԱՆ, 8 սեպտեմբերի. /Նովոստի-Արմենիա/. Հայաստանի ֆուտբոլի հավաքականի և Դորտմունդի «Բորուսիա» ակումբի կիսապաշտպան Հենրիխ Մխիթարյանը վնասվածք է ստացել Եվրո-2016 առաջնության ընտրական փուլի շրջանակում կայացած Դանիայի հավաքականի հետ առաջին հանդիպման ժամանակ, խաղից հետո կազմակերպված մամուլի ասուլիսի ժամանակ տեղեկացրել է Հայաստանի հավաքականի գլխավոր մարզիչ Բեռնար Շալանդը:
Կիրակի Կոպենհագենում կայացած հանդիպումն ավարտվել է Դանիայի հավաքականի հաղթանակով (2:1): Մխիթարյանը դարձել է առաջին գոլի հեղինակը, սակայն նա փոխարինվել է խաղի 71-րդ րոպեին, երբ խաղի հաշիվը 1:1 էր: Դանիայի հավաքականից գոլի հեղինակներ են դարձել կիսապաշտպաններ Պիեռ-Էմիլ Խյոյբերգն ու Թոմաս Կալենբերգը:
«Այո, Մխիթարյանը վնասվածք է ստացել: Դեռ չգիտեմ, թե որքան լուրջ է այն, դա պետք է ասեն բժիշկները»,- մեջբերում է Շալանդի խոսքերը Հայաստանի ֆուտբոլի ֆեդերացիայի պաշտոնական կայքը:
Հայաստանի հավաքականի մարզիչը նշել է, որ Մխիթարյանի՝ դաշտից հեռանալուց հետո խաղը փոխվեց, Դանիայի պաշտպաններն իրենց ավելի վստահ զգացին:
«Մեզ համար շատ դժվար է առանց Մխիթարյանի, Օզբիլիսի և Մովսիսյանի», - նշել է Շալանդը:
Մոսկվայի «Սպարտակ» ակումբի ֆուտբոլիստներ Արաս Օզբիլիսն ու Յուրա Մովսիսյանը վնասվածքների պատճառով բաց են թողել ընտրական փուլի առաջին հանդիպումը:
Հայաստանի հավաքականը Եվրո-2016-ի ընտրական փուլի շրջանակում ուժերը կչափի Դանիայի, Պորտուգալիայի, Ալբանիայի և Սերբիայի հավաքականների հետ:-0-
