ԵՐԵՎԱՆ, 27 օգոստոսի. /Նովոստի–Արմենիա/. WBA վարկածով գերթեթև քաշային կարգում բռնցքամարտի աշխարհի չեմպիոն Սյուզի Կենտիկյանը ծրագրում է աղջիկների մարզադպրոց դպրոց բացել Գերմանիայում և չի բացառում հաղորդավարուհու կարիերան։ Այդ մասին նա չորեքշաբթի հայտնեց լրագրողներին։
«Ես մտադիր եմ շարունակել բռնցքամարտի կարիերան առնվազն առաջիկա երկու տարիներին, ինչից հետո հավանաբար հաղորդավար կդառնամ։ Նմանատիպ առաջարկություններ արդեն եղել են, և ինձ ասում են, որ հաճելի է ինձ դիտել հեռուստաէկրանով»,– ասաց Կենտիկյանը։
Ըստ նրա, կարիերան ավարտելուց առաջ նա ցանկանում է ցույց տալ, որ բռնցքամարտը միայն տղամարդու զբաղմունք չէ, այլ կարող է կնոջ համար էլ լինել։
Մարզիկի խոսքով` երբ ինքն առաջին անգամ մարզադահլիճ է մտել, այնտեղ միայն տղաներ են եղել, և ստիպված է եղել մարզվել երիտասարդների հետ, սակայն մարզիչը նրա մեջ է տաղանդ տեսել։
«Ինքս տարբեր մարզաձևեր եմ փորձել, ինչպես կարատե, լող և այլն, բայց ընտրել եմ բռնցքամարտը։ Մարզվելու իմ ցանկությունը շատ մեծ էր և, չնայած դժվարություններին, մարզվում էի։ Գնում էի մարզումների դպրոցից հետո, իսկ մարզումից հետո` աշխատանքի»,– խոստովանեց Կենտիկյանը։
Այս կապակցությամբ նա նշեց, որ հաջորդ տարի ծրագրում է աղջիկների համար բռնցքամարտի դպրոց բացել, իսկ ինչ վերաբերում է այն հայուհիներին, ովքեր ուզում են իրենց ուժերը փորձել բռնցքամարտում, ապա, ինչպես նշեց Կենտիկյանը, «եթե ցանկություն կա, ապա պետք է փորձեն իրենց ուժերը»։
Գերմանիայի դրոշի ներքո հանդես եկող հայուհի Սյուզի «Մարդասպան թագուհի» Կենտիկյանը 2014 թվականի հունիսի 1–ին պաշտպանել է WBA վարկածով չեմպիոնական տիտղոսը` հաղթելով հարավկորեացի Դան Բի Կիմին։
WBA վարկածով աշխարհի չեմպիոնի տիտղոսը Կենտիկյանը վերադարձրել է 2013 թվականի հուլիսին այդ կարգում նախկին չեմպիոնուհի Կարինա Մորենայի հետ ռևանշից հետո։ -0-
