Բռնցքամարտիկ Վլադիմիր Կլիչկոն հոդի վնասվածքի պատճառով չեղյալ է հայտարարել Պուլևի հետ մենամարտը. ԶԼՄ

ԵՐԵՎԱՆ, 25 օգոստոսի. /Նովոստի–Արմենիա/. Ուկրաինացի բռնցքամարտիկ, IBF, WBA, WBO և IBO վարկածներով գերծանր քաշային կարգում աշխարհի չեմպիոն Վլադիմիր Կլիչկոն հոդի վնասվածքի պատճառով չեղյալ է հայտարարել բուլղարացի Կուբրատ Պուլևի հետ մենամարտը, հայտնում է Bild.de–ն։

2013 թվականի օգոստոսին Պուլևն IBO վարկածով աշխարհի չեմպիոնի տիտղոսի մենամարտի պարտադիր հավակնորդ է դարձել, երբ հաղթել է ամերիկացի Թոնի Թոմփսոնին։ 33–ամյա բուլղարացու և 38–ամյա ուկրաինացու միջև մենամարտը պետք է կայանար սեպտեմբերի 6–ին Համբուրգի 16–հազարանոց O2 World Arena–ում։

Կլիչկոն վնասել է ծնկահոդն Ավստրիայի մարզաճամբարում։ Վնասվածքի պատճառով ուկրաինացու մարտը կհետաձգվի երկու ամսով և, հավանաբար, կանցնի հոկտեմբերի վերջին, հաղորդում է ՌԻԱ Նովոստին։

Կլիչկո կրտսերը պրոֆեսիոնալ ռինգում 62 հաղթանակ է տարել (52–ը` նոկաուտով) և երեք պարտություն։ -0-