ԵՐԵՎԱՆ, 24 հունիսի. /Նովոստի–Արմենիա/. Հայաստանի շախմատի հավաքականը Նորվեգիայում կայանալիք առաջիկա օլիմպիադային, բացի հաղթանակից, այլ նպատակ չունի, լրագրողներին ասաց հայկական հավաքականի առաջնորդ Լևոն Արոնյանը։
Շախմատի 41-րդ օլիմպիադան կանցկացվի նորվեգական Տրոմսյո քաղաքում 2014 թվականի օգոստոսի 1-ից 14-ը։ Հայաստանի շախմատի հավաքականը Շախմատի համաշխարհային օլիմպիադաների եռակի չեմպիոն է։
«Սպասելիքները նույնն են։ Հաղթանակից բացի, այլ նպատակ չունենք։ Մենք պետք է պայքարենք հաղթանակի համար»,– ասաց Արոնյանը։
Նրա խոսքով` օլիմպիադան Նորվեգիայում անցկացնելու փաստը պայմանավորված է այն հանգամանքով, որ այդ երկին իր լեռնային ռելիեֆով նման է Հայաստանին։
Արոնյանը նշեց, որ հայրենիք է ժամանել երեք բարդ մրցախաղից հետո և տասն օրվա ընթացքում կփորձի ուժերը վերականգնել օլիմպիադային պատրաստվելու համար։
Մամուլի ասուլիսին ներկա էր նաև աշխարհի չեմպիոն Մագնուս Կարլսենը։ Նա նշեց, որ Նորվեգիայում երկար են սպասել օլիմպիադայի անցկացմանը։ Այնուհանդերձ նորվեգական հավաքականի հավակնություններն ավելի համեստ են, քան Հայաստանի հավաքականինը։ «Մենք պետք է բարելավենք մեր ցուցանիշները Հայաստանի հավաքականի հետ մրցապայքարում։ Վերջին անգամ մենք պարտվել ենք 4։0 հաշվով»,– ասաց Կարլսենը։
Նրա խոսքով` այն, թե ինչպես են վերաբերվում շախմատին Հայաստանում, հիացմունքի է արժանի և պետք է օրինակ հանդիսանա աշխարհի համար։
Մագնուս Կարլսենը Հայաստան է ժամանել Հայաստանի զարգացման նախաձեռնություններ (IDeA) հիմնադրամի և Ակրոնիս ընկերության հրավերով։ Այցի ընթացքում նախատեսված են հանդիպումներ Հայաստանի պետական և հոգևոր բարձրաստիճան այրերի, տեղեկատվական տեխնոլոգիաների և շախմատի ոլորտի ներկայացուցիչների հետ։ -0-
