ԵՐԵՎԱՆ, 19 հունիսի. /Նովոստի-Արմենիա/. 2013թ.-ի աշխարհի լավագույն ֆուտբոլիստ Կրիշտիանու Ռոնալդուի բժիշկը խորհուրդ է տվել ֆուտբոլիստին ծնկի վնասվածքի պատճառով ավարտել աշխարհի առաջնության ելույթները: Այս մասին, ինչպես գրում է ՌԻԱ Նովոստին, հաղորդում է NBC Sports-ը՝ հղում անելով El Confidential-ին:
Չորեքշաբթի Պորտուգալիայի հավաքականի առաջատար ֆուտբոլիստը ժամանակից շուտ ավարտել է Բրազիլիայում թիմի մարզումները, հարձակվողը հեռացել է մարզադաշտից ձախ ծնկին սառույց դրած վիճակում: Վիրաբույժ Ժոզե Կառլուշ Նորոնիան զգուշացրել է Ռոնալդուին, որ նա կարող է վնասել ջիլը, եթե չդադարի ծանրաբեռնել հոդը:
Պորտուգալիայի ֆուտբոլի ֆեդերացիան և հավաքականի պաշտոնական աղբյուրներն այս տեղեկության վերաբերյալ դեռ ոչ մի մեկնաբանություն չեն արել:
Պորտուգալացիները 2014թ.-ի աշխարհի առաջնության առաջին խաղում Գերմանիայի հավաքականի հետ խաղում պարտվել են 0:4 հաշվով՝ կորցնելով երեք ֆուտբոլիստի (Պեպե՝ դաշտից հեռացում, Ուգու Ալմեյդա և Ֆաբիու Կոենտրաու՝ վնասվածքներ): Կիրակի Պաուլու Բենտուի թիմը պետք է ուժերը չափի ԱՄՆ-ի հավաքականի հետ:-0-
