«Տարբերվի՛ր. Եղի՛ր համարձակ» կարգախոսով մարզական էքստրեմալ ֆլեշմոբերի շարք է մեկնարկել Երևանում սլեքլայնի ցուցադրական ելույթներով
ԵՐԵՎԱՆ, 31 մայիսի. /Նովոստի–Արմենիա/. «Ժայռ» ՀԵՀԿ կողմից կազմակերպված «Տարբերվի՛ր. Եղի՛ր համարձակ» կարգախոսով ֆլեշ-մոբերի շարք է մեկնարկել Երևանում սլեքլայնի ցուցադրական ելույթներով։
Սլեքլայնը` թույլ ձգած ժապավենի վրայով քայլելը, հավասարակշռության պահպանման պրակտիկա է և զարգացող մարզաձև, դա հատուկ նեյլոնային ժապավենների վրայով քայլելն է, որոնք ձգված են ստացիոնար օբյեկտների` կայանների միջև։
«Մեր հիմնական նպատակն առողջ ապրելակերպի քարոզումն է հայկական երիտասարդության շրջանում, ինչպես նաև հետաքրքրության բարձրացումը զարգացող մարզաձևերի նկատմամբ»,– միջոցառման ընթացքում հայտնեց «Ժայռ» կազմակերպության ղեկավար Ալեքսան Մինասյանը։
Միջոցառմանը մասնակցեցին մոտ 40 երիտասարդ սլեքլայներներ։ Ինչպես նշեց «Step slackliners» խմբի մասնակից Նարեկ Ալեքսանյանը, նմանատիպ ֆլեշմոբն անցկացվում է Երևանում առաջին անգամ։
«Սլեքլայնը ոչ միայն մարզաձև է, որքան ակտիվ հանգստի տեսակ։ Առայժմ այն բավականաչափ հայտնի չէ աշխարհում, սակայն Հայաստանում դրանով ավելի են սկսել հետաքրքրվել ինչպես տղաները, այնպես էլ աղջիկները»,– ասաց Ալեքսանյանը։
Նա ավելացրեց նաև, որ խմբի պարապմունքները հաճախ անցնում են բաց երկնքի տակ` սլեքլայնի մասսայականացման համար։
Միջոցառման կազմակերպիչ Գոհար Կարապետյանը լրագրողներին հայտնեց, որ ֆլեշմոբերը կանցկացվեն ամեն շաբաթ` մինչև հուլիս։
«Մենք կշարունակենք քարոզել առողջ կենսակերպը և ոչ այնքան հայտնի մարզաձևերը»,– ասաց նա։
Հաջորդ միջոցառումը կանցկացվի հունիսի 7–ին` ժամը 13։00–ին Երևանի քաղաքապետարանի մոտակա պուրակում։ Դրանք կլինեն Վինգ- Չունի՝ հնագույն ու քիչ հայտնի մարտարվեստներից մեկի ցուցադրական ելույթներ: Հունիսի 21-ին, ժամը` 17:00-ին Հյուսիսային պողոտայում կանցկացվի բայքերական հավաք – շոու, որի ժամանակ քաղաքի մոտ 30 բայքերներ հանրությանը կներկայացնեն իրենց ինքնատիպ մոտոցիկլները: Նշենք, որ ամսվա վերջում Թումանյանի այգու տարածքում անց է կացվելու «Ֆրիռանինգի» (պարկուրի տարատեսակ) ցուցադրական ելույթ, իսկ կամփոփվի շարքը Դրիֆթ-շոուով (ավտոմեքենաներով պտույտ կատարելու տեխնիկա)»։
«Ժայռ» ՀԵՀԿ ստեղծվել է 2001թ. Մոնթե Մելքոնյանի անվան ռազմամարզական վարժարանի հիմնադիր, ՊՆ ռազմական ինստիտուտի նախկին պետ Ալեքսան Մինասյանի կողմից: Կազմակերպության հիմնական նպատակն է. պայքարել երիտասարդության շրջանում հասարակական խնդիրների հանդեպ անտարբերության դեմ, երիտասարդների մեջ սերմանել հայրենատիրության գաղափարը, նպաստել երիտասարդների՝ հասարակական գործընթացներում ներգրավվածության մակարդակի բարձրացմանը: Հիմնվելով այն մտքի վրա, որ հայրենիքը իրավունք լինելուց զատ նաև պարտականություն է «Ժայռ» ՀԵՀԿ-ն ձգտում է հայ երիտասարդի մեջ արմատավորել պատասխանատվության գիտակցումը: Կազմակերպությունն իր գործունեությամբ նպաստում է Հայաստանում
կամավորության զարգացմանը, հասարակության մեջ այդ գաղափարի նկատմամբ գիտակցված, քաղաքացիական պատասխանատվության վրա հիմնված վերաբերմունքի ձևավորմանը։-0-
