ԵՐԵՎԱՆ, 10 մարտի. /Նովոստի–Արմենիա/. Հայաստանի ֆուտբոլի ֆեդերացիայի նախագահ Ռուբեն Հայրապետյանը Հայաստան–Ռուսաստան ընկերական խաղում հայերի կրած պարտությունը բացատրեց հայ ֆուտբոլիստների ֆունկցիոնալ վատ վիճակով։
Ռուսաստանի և Հայաստանի հավաքականների ընկերական հանդիպումը անցավ մարտի 5–ին Կրասնոդարի «Կուբան» մարզադաշտում։ Ռուսները հայերին հաղթեցին 2։0 հաշվով Ալեքսանդր Կոկորինի և Դմրիտրի Կոմբարովի գոլերի շնորհիվ։
«Ռուսաստանի հավաքականի հետ շատ վատ խաղացինք։ Դա բացատրելի է` մարտին մեր ֆուտբոլիստները երբեք պատրաստ չեն լինում»,– հայտարարեց Հայրապետյանը` պատասխանելով «Նովոստի–Արմենիա» գործակալության հարցին։
Նա ավելացրեց, որ այսպիսի իրավիճակը պայմանավորված է մի շարք օբյեկտիվ և սուբյեկտիվ պատճառներով, և մասնավորապես, մի քանի առաջատար խաղացողներ` Յուրա Մովսիսյանը, Ռոբերտ Արզումանյանը նոր են կազդուրվել։
Հայաստանի հավաքականի նորանշանակ գլխավոր մարզիչ Բեռնար Շալանդը համաձայնել է ՀՖՖ նախագահի գնահատականների հետ։ «Վստահ կարող եմ ասել, որ հավաքականն ամենալավ խաղը չէ, որ ցուցադրել է, և մասնավորապես, տղաների ֆիզիկական վիճակը շատ վատն էր»,– ասաց Շալանդն իր առաջին մամուլի ասուլիսում։
Նա մասնավորապես նշեց, որ Հայաստանի հավաքականն այդ խաղում վազել է 116 կիլոմետր, մինչդեռ ռուսները` 122 կմ։
ՀՖՖ գործադիր կոմիտեն մարտի 10–ին Հայաստանի հավաքականի գլխավոր մարզչի պաշտոնում հաստատել է շվեյցարացի մասնագետ Բեռնար Շալանդին, ով կպատրաստի հավաքականը Եվրո-2016–ի ընտրական փուլին։
Շալանդի հետ պայմանագիրը ստորագրվել է Եվրոպա-2016 թվականի առաջնության ընտրական փուլի ավարտից առաջ, իսկ հավաքականի հաջող խաղի դեպքում այն կերկարացվի։ -0-
