Սիմոնյանը Հայաստան–Ռուսաստան ընկերական հանդիպման ժամանակ ռուս ֆուտբոլիստների խաղը հաստատուն «չորս» է գնահատել

ԵՐԵՎԱՆ, 6 մարտի. /Նովոստի–Արմենիա/. ԽՍՀՄ հավաքականի և Մոսկվայի «Սպարտակ» ակումբի նախկին հարձակվող Նիկիտա Սիմոնյանը Հայաստանի հավաքականի հետ ընկերական խաղում Ռուսաստանի ֆուտբոլի հավաքականի գործողությունները «չորս» է գնահատել։

Ընկերական հանդիպումը կայացել է չորեքշաբթի Կրասնոդարում և ավարտվել է 2։0 հաշվով դաշտի տերերի հաղթանակով։

«Հայաստանի հավաքականը սպարինգի համար լավ թիմ է, այդ պատճառով կարող եմ ասել, որ երկու թիմերի խաղն էլ դիտարժան էր։ Առաջին խաղակեսը ռուսական թիմը ավելի հարթ անցկացրեց, կոմբինացնում էին, ավելի սուր էին գործում, հետո Ֆաբիո Կապելոն (Ռուսաստանի հավաքականի գլխավոր մարզիչը) շարունակեց հետևել խաղացողներին։ Ես Ռուսաստանի հավաքականի խաղը «չորս» կգնահատեի, իսկ «հինգ» –ի համար չբավարարեց երկրորդ խաղակեսում գործողությունների ներդաշնակությունը», – ասել է Սիմոնյանը «Р-Спорт» գործակալության հետ հեռախոսազրույցում։

ՌՖՄ փոխնախագահն ընդունել է, որ սկզբից էլ այս խաղում նախապատվությունը տալիս էր Ռուսաստանի հավաքականին։

«Յուրա Մովսիսյանը դեռ լավ ֆիզիկական վիճակում չէ։ Հենրիխ Մխիթարյանը ևս մեկ անգամ ցույց տվեց, որ լավ խաղացող է։ Նա գիտի, թե ինչ պետք է անի դաշտում», – ավելացրել է Սիմոնյանը։ «Ինձ համար թանկ է Հայաստանի թիմը, սակայն ես ցանկանում եմ, որ հաղթեն ռուսները, քանի որ ժամանակին, խաղալով «Սպարտակի» կազմում, ես գոլ էի խփում հայկական թիմերին։ Իսկ մի անգամ, երբ երկրորդ գնդակը խփեցի հայկական թիմի դարպասին, ֆոտոթղթակիցն իմ մայրենի լեզվով դարպասների հետևից բղավեց` «Չես ամաչու՞մ հայրենակիցներիդ դարպասին գոլ ես խփում», սակայն սա ֆուտբոլ է»։

«Ռուսաստանի հավաքականը աշխարհի առաջնության մասնակից է, և նա պետք է վստահություն ձեռք բերի։ Իսկ Հայաստանի հավաքականը պետք է նախապատրաստվի Եվրոպայի առաջնության ընտրական փուլին, և նրանց ևս պետք է հաջողություն մաղթել, քանի որ շատ հետաքրքիր թիմ է», – ավելացրել է գործակալության զրուցակիցը, հաղորդում է ՌԻԱ Նովոստին։–0–