ԵՐԵՎԱՆ, 3 մարտի. /Նովոստի–Արմենիա/. Երևանում ընթացող Եվրոպայի շախմատի անհատական առաջնությանը կխաղարկվի Աշխարհի գավաթ – 2015-ի 23 ուղեգիր, «Նովոստի-Արմենիա» գործակալությանը հայտնեց Եվրոպայի առաջնության գլխավոր մրցավար, Հայաստանի շախմատի ֆեդերացիայի փոխնախագահ Աշոտ Վարդապետյանը։
«Պաշտոնական մրցաշարերի առանձնահատկությունն այն է, որ դրանց մասնակիցները ոչ միայն շախմատ են խաղում և պայքարում մրցանակների համար, այլ նրանց շրջանակներում խաղարկվում է աշխարհի չեմպիոնի կոչման համար պայքարը շարունակելու ուղեգրեր», – ասել է Վարդապետյանը աշխարհի 9–րդ չեմպիոն Տիգրան Պետրոսյանի հուշամրցաշարի բացման պաշտոնական արարողությունից առաջ։
Նրա խոսքերով` այս մրցաշարին մասնակցում է շուրջ 140 ուժեղագույն գրոսմայստեր, այդ թվում` կանայք, ինչն ինքնին մրցաշարը վերածում է շախմատային տոնի։
Այս կապակցությամբ մրցավարը դժվարացել է մրցաշարի մասնակիցների շրջանում ֆավորիտներ նշել` ընդգծելով միայն, որ ամենամեծ վարկանիշն ունի ֆրանսիացի գրոսմայստեր Էտյեն Բակրոն (վարկանիշը` 2739)։ «Կարող եմ նաև նշել, որ մեզ մոտ 14 շախմատիստ ունի 2700–ից ավելի վարկանիշ, ինչը էքստրադասի ցուցանիշ է, այսինքն ֆավորիտները շատ են», – նշել է նա։
Խոսելով հայ շախմատիստների հնարավորությունների մասին` Վարդապետյանը նշել է, որ հայ առաջատար շախմատիստների առջև նպատակ է դրված որքան հնարավոր է բարձր տեղ զբաղեցնել։
Առաջնությունը անցկացվելու է Էլիտ Պլազա բիզնես կենտրոնում 2014թ. մարտի 3-ից մինչև 14-ը: Երկու շաբաթվա ընթացքում մրցաշարի մեդալների համար կպայքարի 27 երկրի 263 շախմատիստ։ Մրցաշարի մասնակիցների թվում կա շուրջ 130 գրոսմայստեր և ավելի քան 200 միջազգային վարպետ։
Հայաստանը կներկայացնի մոտ 80 շախմատիստ, Ռուսաստանը` 53 շախմատիստ, Վրաստանը` 17, Իսրայելը` 17, Ուկրաինան` 13, Թուրքիան` 10։
Մրցանակային ֆոնդը 160 000 եվրո է: Մրցաշարի հաղթողը կստանա 20 հազար եվրո։ Միավորների հավասարության դեպքում մրցանակային գումարը հավասարաչափ կկիսվի։ Նախատեսված է 25 հիմնական և 15 հատուկ մրցանակ։
Առաջնության պաշտոնական կայքը (www.eicc2014.am) սկսել է գործել հունվարի 29–ից։
Շախմատի աշխարհի առաջնությունը կանցկացվի 2015 թ.–ին Բաքվում։
Հայկական շախմատի դպրոցը համարվում է աշխարհի ամենաուժեղներից մեկը։ Հայաստանի տղամարդկանց ազգային հավաքականը շախմատի երկակի օլիմպիական չեմպիոն է (Թուրին՝ 2006թ.-ին, Դրեզդեն՝ 2008թ.-ին, Ստամբուլ` 2012թ.-ին)։ -0-
