ԵՐԵՎԱՆ, 17 փետրվարի. /Նովոստի–Արմենիա/. Հայաստանի ֆուտբոլի հավաքականը փետրվարի 23–ին Շվեյցարիայի Նյոն քաղաքում կայանալիք Եվրո–2016–ի ընտրական փուլի վիճակահանության ժամանակ կներկայացնի Հայաստանի ֆուտբոլի ֆեդերացիայի առաջին փոխնախագահ և գործադիր տնօրեն Արմեն Մինասյանը, «Նովոստի–Արմենիա» գործակալությանը տեղեկացրին ՀՖՖ մամուլի ծառայությունից։
Միաժամանակ գործակալության զրուցակիցը չպարզաբանեց, թե ով կգլխավորի Հայաստանի հավաքականը մարտի 5–ին Ռուսաստանի հավաքականի հետ կայանալիք ընկերական հանդիպման ժամանակ։
«Երբ գլխավոր մարզչի պաշտոնի թեկնածուի հետ ձեռք կբերվի վերջնական պայմանավորվածություն, մենք կհրապարակենք նրա անունը», – նշեց մամուլի ծառայության ներկայացուցիչը։
Հանդիպումը կկայանա Կրասնոդարի «Կուբան» մարզադաշտում մարտի 5-ին 18։00-ին։
Պաշտոնական մրցաշարերում հավաքականները հանդիպել են չորս անգամ։ Երեք խաղում հաղթել են ռուսները, մեկ խաղն ավարտվել է ոչ–ոքի հաշվով։
Հայաստանի հավաքականը հունիսի 6-ին ծրագրում է ընկերական հանդիպում անցկացնել Աշխարհի առաջնության եզրափակիչ փուլի մասնակիցներից մեկի` Գերմանիայի հավաքականի հետ։-0-
