ԵՐԵՎԱՆ, 14 փետրվարի. /Նովոստի–Արմենիա/. Գեղասահորդ Եվգենի Պլյուշչենկոյի որոշումը` դուրս գալ Սոչիի Օլիմպիադայի տղամարդկանց մենասահքի մրցումներից, միանշանակ չէ, դրա պատասխանատվությունը կրում է մարզիկի թիմը և Ռուսաստանի չմուշկներով գեղասահքի ֆեդերացիան, հայտնել է 1994 թվականի տղամարդկանց մենասահքի օլիմպիական չեմպիոն Ալեքսեյ Ուրմանովը, հաղորդում է «ՌԻԱ Նովոստին»։
Պլյուշչենկոն հինգշաբթի` փետրվարի 13–ի երեկոյան, հրաժարվել է տղամարդկանց մենասահքի կարճ ծրագրի իր ելույթից Սոչիի Օլիմպիադայում մեջքի ցավերի պատճառով։ Մրցումներից դուրս գալուց հետո գեղասահորդը պաշտոնապես հայտարարել է իր մարզական կարիերայի ավարտի մասին։
«Ես Օլիմպիադայի նախօրեին շատ լավ բաներ եմ ասել, այժմ այդ թեմայով խոսել չեմ ցանկանում, այն միանշանակ չէ։ Այնտեղից մեկնել եմ, և կոնկրետ իրավիճակը չգիտեմ։ Ինձ համար այն միանշանակ չէ»,– ասել է Ուրմանովը «ՌԻԱ Նովոստիին»։
Ռուսաստանի հավաքականի կազմում Պլյուշչենկոն Սոչիում դարձել է թիմային մրցումների օլիմպիական չեմպիոն։
«Դե ինչ ասեմ, ընդհանուր առմամբ թիմային մրցումը կայացել է, թիմայինը ստացվել է։ Մնացածը Ժենյայի թիմի և ֆեդերացիայի խղճին է։ Իհարկե, նրանք ավելի շատ մտածելու բան ունեն»,– ավելացրել է նա` պատասխանելով Պլյուշչենկոյին թիմի կազմում ընդգրկելու որոշման ճշմարտացի լինելու մասին հարցին։ -0-
