ԵՐԵՎԱՆ, 13 հունվարի. /Նովոստի–Արմենիա/. Լոնդոնի Օլիմպիական խաղերի բրոնզե մեդալակիր, աշխարհի կրկնակի չեմպիոն, բռնցքամարտիկ Միշա Ալոյանը կգլխավորի Russian Boxing Team–ը Բռնցքամարտի համաշխարհային սերիայի շրջանակներում Լեհաստանի հավաքականի դեմ կայանալիք արտագնա հանդիպման ժամանակ, որը տեղի կունենա հունվարի 18–ին, «Р-Спорт» գործակալությանը հայտարարել է Ռուսաստանի հավաքականի ավագ մարզիչ Էդուարդ Կրավցովը։
Ռուսաստանցիները հինգ հանդիպումներում տարել են երեք հաղթանակ և B խմբում զբաղեցնում են երրորդ հորիզոնականը։ Լեհաստանի հավաքականը զիջել է բոլոր հինգ հանդիպումներում և զբաղեցնում է 6–րդ հորիզոնականը։ WSB–ի մրցաշարին մասնակցում է 12 թիմ, նախնական փուլում կա երկու խումբ, գրում է «ՌԻԱ Նովոստին»։
«Լեհաստանի հետ հանդիպման ժամանակ թիմի կազմը հայտնի է», – ասել է Կրավցովը։ «Մինչև 52 կգ քաշային կարգում մեր թիմը կներկայացնի Միշա Ալոյանը, իսկ մինչև 60 կգ քաշային կարգում մենք որոշեցինք փորձել Ռուսաստանի չեմպիոն Կոնստանտին Բոգոմազովին։ Մինչև 69 կգ քաշային կարգում հանդես կգա Ալեքսանդր Բեսպուտինը, իսկ մինչև 81 կգ քաշային կարգում` Ալեքսանդր Խոտյանցևը։ Մենք նախատեսում էինք ներկայացնել Նիկիտա Իվանովին, սակայն մարզիկը փոքր–ինչ վատառողջ է։ Իսկ գերծանր քաշային կարգում (91 կգ–ից բարձր) հանդես կգա Իվան Վերյասովը, ով տաղանդավոր և հեռանկարային բռնցքամարտիկներից է»։
Մասնագետը նշել է, որ «WSB–ի հանդիպումների փորձը մեր մարզիկներին օգտակար կլինի նաև օլիմպիական բռնցքամարտի ժամանակ»։
«Մենք ընդհանուր առմամբ ծանոթ ենք լեհ բռնցքամարտիկներին», – շարունակել է գործակալության զրուցակիցը։ «Ծանոթ չէ միայն հայ երիտասարդ լեգիոներ Ժորա Սիմոնյանը, ով հանդես կգա մինչև 69 կգ քաշային կարգում։ Հարկ է նշել, որ լեհերը բավականին լուրջ են պատրաստվում հենց այս հանդիպմանը։ Այս մասին խոսում է նաև այն փաստը, որ սեփական հարկի տակ անցկացրած բոլոր նախկին հանդիպումները (Կուբայի և Ղազախստանի հավաքականների դեմ) լեհերն անցկացրել են այլ քաղաքներում, իսկ Ռուսաստանի հավաքականի հետ հանդիպումը որոշել են կազմակերպել Վարշավայում։ Մեր բոլոր տղաները լավ մարզավիճակում են և պետք է լավ բռնցքամարտ ցուցադրեն»։
WSB–ի եզրափակիչ մենամարտը տեղի կունենա մայիսի 30–31–ին Կիևում։ –0–
