Կառլսենն ու Արոնյանը Հոլանդիայում կպայքարեն առաջին տեղի համար. շախմատի փորձագետ

Նորվեգացի Մագնուս Կառլսենն ու հայ Լևոն Արոնյանը կպայքարեն առաջին տեղի համար Հոլանդիայի Վեյկ-ան-Զեեում անցկացվող ներկայացուցչական մրցաշարի ժամանակ: Մրցաշարի մյուս մասնակիցներից ոչ մեկը չի կարող մրցել նրանց հետ, «Р-Спорт» գործակալությանը հայտարարել է Մոսկվայի շախմատի ֆեդերացիայի փոխնախագահ, միջազգային գրոսմայստեր Սերգեյ Սմագինը:

Կառլսենն ու Արոնյանը ութ փուլերի արդյունքում վաստակել են 5,5-ական միավոր և գլխավորում են մրցաշարային աղյուսակը, որին մասնակցում է աշխարհի լավագույն տասնյակում ներառված տասը շախմատիստներից յոթը: Առաջատարներից կես միավորով հետ է մնում ադրբեջանցի Թեյմուր Ռաջաբովը, մեկ միավոր պակաս են վաստակել ուկրաինացի Վասիլի Իվանչուկը, ամերիկացի Հիկարու Նակամուրան և իտալացի Ֆաբիանո Կարուանան:

«Կարծում եմ, որ Վեյկ-ան-Զեեում ցուցադրած խաղի որակով մրցաշարի մասնակիցներից ոչ ոք չի կարող մրցել Մագնուս Կառլսենի և Լևոն Արոնյանի հետ», - ասել է Սմագինը: «Այո, հաջողություն լինում է, սակայն միայն հաջողության շնորհիվ մրցաշարում հաղթանակ չես տանի: Այո, Թեյմուր Ռաջաբովը (ով գտնվում է երրորդ տեղում) կարող է ինչ-որ տեղ հաղթել հանդիպումը, իսկ առաջատարներից մեկը կարող է անհաջողություն կրել: Սակայն ցուցադրած խաղով Կառլսենն ու Արոնյանն ավելի լավ վիճակում են, նրանց խաղի մակարդակը չափազանց բարձր է: Հաշվի առնելով մրցաշարի մասնակիցների բարձր մակարդակը՝ հինգբալանոց սանդղակով նրանց կարելի է վստահաբար մաքուր հինգ դնել»:

Գործակալության զրուցակիցը նաև կարծում է, որ Կառլսենը փոքր-ինչ ավելի շատ շանսեր ունի հաղթել մրցաշարում, քան Արոնյանը՝ մոտավորապես 55/45-ի: «Հաշվի առնելով Մագնուսի տարիքը՝ կարելի է ասել, որ նա դեռևս «չի հագեցել» շախմատից», - նշել է գրոսմայստերը: «Եվ ամեն մրցաշարի ժամանակ նա խաղում է մեծ ցանկությամբ, ոգևորությամբ, ինչն էլ, հաշվի առնելով նաև նրա խաղի բարձր մակարդակը, հանգեցնում է ցանկանալի արդյունքի»:

Զուգահեռներ անցկացնելով մրցաշարի առաջատարների միջև՝ Սմագինը Ռաջաբովի ցուցադրած խաղը գնահատեց «չորս», հաղորդում է «ՌԻԱ Նովոստին»: «Թեյմուրը վերջերս փոխել է իր խաղաոճն ու գործում է շատ ավելի զգույշ, քան նախկինում», - նշել է փորձագետը: «Նա շատ լավ մակարդակում է խաղում, սակայն ինձ, ամեն դեպքում, թվում է, որ նման երիտասարդ տարիքում չարժե «սեղմվել» և խաղալ՝ հույսը դնելով ինչ-որ շանսերի վրա: Հարկավոր է խաղալ «լայն», ինչպես խաղում են Կառլսենն ու Արոնյանը: Իմ կարծիքով՝ նման շախմատիստների աճը անկեղծ, փոխադարձաբար սուր, մեծ խաղի արդյունք է: Իսկ Ռաջաբովն, ամեն դեպքում, նախընտրում է ռիսկի չգնալ, նա ավելի շատ հնարավորությունների է սպասում»:

Հոլանդիայում անցկացվող մրցաշարը կավարտվի հունվարի 29-ին:-0-