Հակոբյանը և Ֆրիդմանը ոչ-ոքի են խաղացել Շախմատի եվրոպայի առաջնության որոշիչ տուրում

Հայաստանցի գրոսմայստեր Վլադիմիր Հակոբյանը և գերմանացի Դանիել Ֆրիդմանն ուրբաթ ոչ-ոքի են խաղացել Շախմատի եվրոպայի թիմային առաջնության վերջին՝ իններորդ տուրում, որն անցնում է Պորտո Կարաս հունական հանգստավայրում:

Ավելի վաղ համանման արդյունքով իրենց հանդիպումը եզրափակեցին Արկադի Նայդիչը և Լևոն Արոնյանը:

Մնացած երկու տախտակների վրա խաղը շարունակվում է՝ Սերգեյ Մովսիսյանը պայքարում է Գեորգ Մայերի դեմ, Գաբրիել Սարգսյանը՝ Յան Գուստավսոնի:

Մրցաշարային աղյուսակն այս պահին գլխավորում է Հայաստանը՝ լրացուցիչ ցուցանիշներով առաջ անցնելով Գերմանիայի թիմից:

Այսպիսով, հաղթանակի դեպքում Հայաստանի հավաքականը կդառնա շախմատի պատմության մեջ միակը, որը մեկ տարվա ընթացքում հաղթել է և աշխարհի, և Եվրոպայի առաջնությունում:

Եվրոպայի թիմային առաջնությունը մեկնարկել է նոյեմբերի 2-ին: Կանանց և տղամարդկանց մրցաշարերն անցկացվում են շվեյցարական 9-տուրանոց համակարգով, բոլոր թիմերի կազմերում են 4 հիմնական խաղացողներ և մեկ պահուստային: Տղամարդկանց մրցաշարին մասնակցում է 38 թիմ, կանանց մրցաշարին՝ 28: -0-