Շումախերը «Մերսեդեսի» հետ պայմանագիրը կերկարացնի մինչև 2013 թվականը. ԶԼՄ

«Ֆորմուլա-1»-ի յոթակի չեմպիոն Միխայել Շումախերը, հնարավոր է, ևս մեկ խաղաշրջանով երկարացնի «Մերսեդեսի» հետ պայմանագիրը, հայտնում է ՌԻԱ Նովոստին՝ հղում անելով Sport Bild-ին:

Չեմպիոնի ընթացիկ պայմանագիրը «Մերսեդեսի» հետ լրանում է 2012 թվականին: Պարբերականը փաստում է, որ պայմանագրի երկարացման համաձայնագիրը ձեռք է բերվել Սինգապուրի Գրան-պրիի ժամանակ, թեև մանրամասները կողմերը դեռ չեն քննարկել:

«Ես ապացուցեցի, որ կարող եմ ավելի արագ վարել, քան իմ թիմակից Նիկո Ռոսբերգը: 2012 թվականին մենք պետք է դնենք այն հիմքերը, որոնք մեզ թույլ կտան պայքարել տիտղոսի համար 2013 թվականին»,- հայտարարել է Շումախերը:

 «Մերսեդեսի» ղեկավար Ռոս Բրաունը նշել է, որ «Միխայելը չի կորցրել ճարպկությունը և առաջվա պես արժեք է ներկայացնում թիմի համար»:--0-