Անգլիայի ֆուտբոլի հավաքականի մարզիչ Կապելլոն խոստացել է Ռունիին հայտավորել Եվրոպայի 2012 թ.-ի առաջնության հանդիպումներում

ԵՐԵՎԱՆ, 4 նոյեմբերի. /Նովոստի-Արմենիա/. Անգլիայի ֆուտբոլի հավաքականի մարզիչ Ֆաբիո Կապելլոն հանդիպել է «Մանչեսթեր Յունայթեդ» ակումբի հարձակվող Ուեյն Ռունիի հետ, որպեսզի հավաստիացնի նրան, որ ֆուտբոլիստը, ով ստիպված է բաց թողել Եվրո-2012-ի շրջանակներում անցկացվող երեք մեկնարկային խաղերը, կհայտավորվի ազգային թիմում, հաղորդում է «ՌԻԱ Նովոստին»՝ հղում անելով The Telegraph-ին:

Ռունին հեռացվել էր դաշտից Եվրոպայի առաջնության ընտրական փուլի շրջանակներում Մոնտենեգրոյի հետ հանդիպման ժամանակ Միոդրագա Ջուդովիչի դեմ կոպիտ խաղ ցուցադրելու պատճառով: ՈՒԵՖԱ-ն որոշում է ընդունել երեք պաշտոնական հանդիպումով որակազրկել ֆուտբոլիստին: Այսպիսով Ռունին չի կարող մասնակցել Եվրո-2012-ի եզրափակիչ մասի խմբային փուլի բոլոր հանդիպումներին:

Ըստ The Telegraph-ի՝ Կապելլոն հանդիպել է հարձակվողի հետ Քարինգթոնում գտնվող «Մանչեսթեր Յունայթեդ» ակումբի մարզչական բազայում և տեղեկացրել նրան, որ չնայած որակազրկմանը, կհայտավորի խաղացողին Եվրոպայի առաջնության 23 մասնակիցների կազմում: Սակայն Ռունին չի մասնակցի Անգլիայի հավաքականի առաջիկա երկու ընկերական հանդիպումներին, որոնք կանցկացվեն Իսպանիայի և Շվեյցարիայի հավաքականների հետ:

«Ես ցանկանում եմ մասնակցել Եվրոպայի առաջնությանը, ցանկանում եմ լինել թիմի մի մասը: Սակայն կհասկանամ Կապելլոյին, եթե նա հավաքականի կազմում հայտավորի միայն նրանց, ովքեր կարող են մասնակցել հավաքականի բոլոր խաղերին: Ակնհայտ է, որ որակազրկումը իմ մեղքն է, ես դժգոհելու որևէ առիթ չունեմ», - ավել վաղ հայտարարել է Ռունին:

Եվրոպայի առաջնությունը կանցկացվի Լեհաստանում և Ուկրաինայում 2012 թ.-ի հունիսի 8-ից հուլիսի 1-ը:-0-