ԵՐԵՎԱՆ, 18 հոկտեմբերի. /Նովոստի-Արմենիա/. Հայաստանի ֆուտբոլի հավաքականն ի վիճակի է պայքարելու 2014 թվականի աշխարհի առաջնության ուղեգրրի համար, երեքշաբթի լրագրողներին հայտնեց հավաքականի գլխավոր մարզիչ Վարդան Մինասյանը:
Հայաստանի հավաքականն ընդգրկվել է 2014 թվականի աշխարհի առաջնության ընտրական փուլի ուժեղագույն խմբերից մեկում: Վիճակահանության արդյունքներով, B խմբում Հայաստանի հակառակորդներն են Իտալիայի, Դանիայի, Չեխիայի, Բուլղարիայի և Մալթայի հավաքականները:
«Մենք Հայաստանի ֆուտբոլի ֆեդերացիայի ղեկավարի հետ առայժմ չենք քննարկել հավաքականի անելիքները 2014 թվականի աշխարհի առաջնության ընտրական փուլում: Այս խնդիրներն իմ առջև դնում է Ֆեդերացիան, բայց իմ կարծիքով, մեր թիմն ի վիճակի է պայքարելու ուղեգրի համար»,- ասաց Մինասյանը:
Խոսելով այն խմբի մասին, որում հայտնվել է Հայաստանը 2014 թվականի առաջնության ընտրական մրցաշարում, Մինասյանը նշեց, որ այս խումբը միանշանակ ավելի ուժեղ է, քան այն, որում հայկական թիմը հանդես է եկել Եվրո-2012-ում:
«Եթե խոսենք վիճակագրության չոր լեզվով, ապա Դանիայի և Իտալիայի հավաքականները հայտնվել են անմիջականորեն Եվրո-2012-ում, իսկ Չեխիայի հավաքականն անցումային խաղերին մասնակցելու գերազանց հնարավորություններ ունի: Այսինքն, ստացվում է, որ ավելի մեծ հավանականությամբ մեր խմբի միանգամից երեք թիմեր կմասնակցեն Եվրո-2012-ի եզրափակիչ փուլին»,- ասաց Մինասյանը:
Ըստ նրա, գոյություն ունի նաև մյուս կողմը: «Ոչ ոք չի կարող ասել, թե ինչպես և ինչ ձևով այդ թիմերը կմոտենան ԱԱ-2014-ի ընտրական փուլին»,- նշեց հայկական հավաքականի մարզիչը:
«Վերցնենք, օրինակ, Սլովակիայի հավաքականը, որը գերազանց խաղաց 2010 թվականի աշխարհի առաջնությունում, բայց չկարողացավ իրեն դրսևորել Եվրո-2012-ի ընտրական փուլում»,- նշեց Մինասյանը:
Սակայն, նրա խոսքով, առաջին հայացքից Հայաստանի հավաքականը շատ լուրջ խմբում է հայտնվել:
«Չի կարելի մոռանալ նաև Բուլղարիայի և Մալթայի հավաքականների մասին: Հատկապես Մալթայի հավաքականն աչքի է ընկնում շատ մեծ առաջընթացով, և այդ թիմը որևէ կերպ չի կարելի համեմատել Անդորրայի հավաքականի հետ»,- ավելացրեց Մինասյանը:
Նա միաժամանակ նկատեց, որ Հայաստանի հավաքականը նույնպես տեղում չի կանգնի, և, «հնարավոր է, դժվար խմբում հայտնվելը մեզ համար դրական գործոն դառնա»: -0-
