ԵՐԵՎԱՆ, 17 հոկտեմբերի. /Նովոստի-Արմենիա/. ԲԿՄԱ-ն, չնայած Չեմպիոնների լիգայում անհաջող մեկնարկին և Ռուսաստանի առաջնությունում գրանցած թույլ արդյունքներին, շարունակում է հավատալ եվրոգավաթի փլեյ-օֆֆ դուրս գալու հնարավորությանը, հայտարարել է բանակայինների կիսապաշտպան Եվգենի Ալդոնինը, հաղորդում է «ՌԻԱ Նովոստին»:
Չեմպիոնների լիգայի խմբային փուլի 3-րդ շրջանի Ռուսաստանի ԲԿՄԱ-ի և Թուրքիայի «Տրաբզոնսպորի» միջև հանդիպումը տեղի կունենա երեքշաբթի «Լուժնիկի» մարզական արենայում:
«Բոլորը հասկանում են, որ մենք գտնվում ենք բարդ իրավիճակում, ունենք վնասվածքներ ստացած շատ ֆուտբոլիստներ, թիմում էմոցիոնալ լարվածություն է տիրում: Սակայն ոչ ոք չի հանձնվում, և մենք հասնելու ենք թիմի առջև դրված նպատակներին, այն է՝ դուրս գալ մրցաշարի փլեյ-օֆֆ: Դրա համար մենք ունենք բոլոր հնարավորությունները», - ասել է Ալդոնինը խաղից առաջ կայացած մամուլի ասուլիսի ժամանակ:
Ֆուտբոլիստը նշել է, որ երկրի առաջնության շրջանակներում «Թերեք» թիմի հետ տեղի ունեցած վերջին հանդիպման ժամանակ բաց թողած հաղթանակից հետո թիմն այդքան էլ լավ հոգեվիճակում չէ: «Նման հանդիպումները դժվար են մոռացվում, սակայն մեր առջև լուրջ խնդիր է դրված՝ հաղթել Չեմպիոնների լիգայի հանդիպման ժամանակ: Այս հանդիպման արդյունքում գրանցած հաղթանակը թույլ կտա մեզ բարձրացնել տրամադրությունը, ամեն ինչ մեր ձեռքում է», - նշել է նա:
Երկու փուլերից հետո «Տրաբզոնսպորը» չորս միավորով գլխավորում է մրցաշարային աղյուսակը: ԲԿՄԱ-ն մեկ միավորով եզրափակում է չորս թիմից բաղկացած աղյուսակը:-0-
