ԵՐԵՎԱՆ, 12 հոկտեմբերի. /Նովոստի-Արմենիա/. Իսպանացի ֆուտբոլային մրցավար Իտուրալդո Գոնսալեսի մրցավարությունից վրդովված հայ երկրպագուները Facebook-ում էջ են բացել և չեն խորշում ոչ մեղմ արտահայտություններից՝ գնահատելով նրա մասնագիտական որակները:
Եվրո-2012-ի ընտրական փուլի շրջանակներում նախօրեին կայացած հանդիպման ժամանակ հայ ֆուտբոլիստներն արտագնա խաղոմ 2:1 հաշվով զիջեցին իռլանդացիներին և զրկվեցին Եվրո-2012-ի եզրափակիչ դուրս գալու համար պայքարը շարունակելուց:
Խաղի 26-րդ րոպեին Գոնսալեսը դաշտից հեռացրեց հայկական հավաքականի դարպասապահ Ռոման Բերեզովսկուն, քանի որ նա տուգանային հրապարակի սահմաններից դուրս իբր ձեռքով խաղաց: Սակայն կրկնապատկերի ժամանակ պարզ երևում էր, որ գնդակը դարպասապահի ձեռքին չի դիպել: Ավելին, գրոհի ժամանակ իռլանդացիների հարձակվող Սայմոն Քոքսը ձեռքով խաղաց: BBC-ին տված հարցազրույցում Քոքսը խոստովանեց, որ գնդակը դիպել է իր ձեռքին:
«We hate Iturralde Gonzales» էջին միացել է ավելի քան հազար մարդ, ովքեր բուռն կերպով քննարկում են Գոնսալեսի մրցավարական գործողությունները՝ իրենց թույլ տալով ոչ պարկեշտ արտահայտություններ մի քանի լեզուներով:
Բացվել են նաև այլ էջեր, որտեղ կարելի է ևս ոչ մեղմ արտահայտությունների հանդիպել, որոնց միջոցով հայ երկրպագուներն արտահայտում են իրենց վրդովմունքը:
Ընտրական փուլի արդյունքներով հայ ֆուտբոլիստները 17 միավորով զբաղեցրեցին երրորդ տեղը: Խմբում 23 միավորով առաջատարի դիրքը զբաղեցրեց Ռուսաստանի հավաքականը, 21 միավոր վաստակած իռլանդացիները կշարունակեն պայքարը Եվրո-2012-ի եզրափակչի ուղեգրի համար:-0-
