Հայաստանի հավաքականն ագրեսիվ է խաղալու մակեդոնացիների հետ հանդիպման ժամանակ. Մինասյան

Հայաստանի հավաքականի գլխավոր մարզիչ Վարդան Մինասյանը հայտնեց, որ հայկական թիմն ագրեսիվ է խաղալու մակեդոնացիների դեմ: 

«Մենք պետք է մրցախաղի սկզբից ագրեսիվ խաղ ցուցադրենք և ճնշում գործադրենք հակառակորդի պաշտպանության վրա»,- հինգշաբթի մամուլի ասուլիսի ժամանակ ասաց Մինասյանը:

Ըստ նրա, մակեդոնացիներն ազատ են խաղալու, քանի որ նրանց վրա չի ազդելու արդյունքը:
«Մակեդոնացիները լավ պատրաստված խաղացողներ ունեն, ովքեր թիմի դեմքն են»,- ասաց Մինասյանը:

Ըստ նրա, Մակեդոնիայի հավաքականի կազմում Գորան Պանդևի բացակայությունը կազդի նրանց խաղի վրա, «բայց ես չգիտեմ՝ լավ, թե վատ առումով»,- ավելացրեց Մինասյանը:

Իտալական «Նապոլիի» հարձակվող Գորան Պանդևը վնասվածքի պատճառով բաց կթողնի Հայաստանի խաղը:

Մակեդոնիայի հետ խաղը կսկսվի հոկտեմբերի 7-ին՝ ժամը 20:00-ին, Երևանի Հանրապետական մարզադաշտում:

Ֆուտբոլի Հայաստանի հավաքականը երրորդ տեղն է զբաղեցնում Եվրո-2012 «В» ընտրական խմբում՝ 4:0 հաշվով սլովակների հանդեպ տարած սենսացիոն հաղթանակից հետո՝ պահպանելով մրցաշարի եզրափակիչ դուրս գալու իրական հնարավորությունները
Հայ ֆուտբոլիստները 14 միավոր են հավաքել և մեկ միավորով զիջում են երկրորդ տեղը զբաղեցրած իռլանդացիներին։ 17 միավորով խմբի միանձնյա  առաջատարը ռուսներն են:

Սլովակները նույնպես 14 միավոր ունեն, բայց նրանք զիջում են հայ ֆուտբոլիստներին անմիջական հանդիպումների արդյունքներով:
Մակեդոնացիներն Անդորրայի նկատմամբ նվազագույն 1:0 հաշվով տարած այսօրվա հաղթանակից հետո 7 միավոր են հավաքել և զբաղեցնում են հինգերորդ տեղը։ Անդորրացիները, տանուլ տալով իրենց բոլոր հանդիպումները, փակում են մրցաշարային աղյուսակը։ Բոլոր թիմերն ութական հանդիպում են ունեցել։ Միաժամանակ հայ ֆուտբոլիստները խփած և բաց թողած գնդակների լավագույն տարբերությունն ունեն՝ -17-7: -0-