Հայկական «Գանձասար» ֆուտբոլային ակումբն ընկերական խաղ կանցկացնի գերմանական «Կառլսրուեի» հետ

Սյունիքի մարզի Կապան քաղաքի «Գանձասար» ֆուտբոլային ակումբը գերմանական «Կառլսրուեի» հետ ընկերական հանդիպում կանցկացնի, հաղորդում է խաղի կազմակերպիչներից մեկի` «Cronimet Mining AG» ընկերության հայկական ներկայացուցչությունը:

Խաղը կկայանա հոկտեմբերի 5-ին ժամը 20:00-ին Երևանի Հանրապետական մարզադաշտում: Մուտքն ազատ է:
«Կառլսրուեն» հանդես է գալիս Երկրորդ Բունդեսլիգայում: Պատասխան խաղը ծրագրվում է անցկացնել Գերմանիայում:
Հանդիպման կազմակերպիչներն են «Cronimet Mining AG» ընկերության գլխավոր տնօրեն, գերմանական Բադեն Վյուրթենբերգում ՀՀ պատվավոր հյուպատոս Գյունթեր Պիլարսկին և «Զանգեզուրի պղնձամոլիբդենային կոմբինատ» ՓԲԸ-ի գլխավոր տնօրեն, «Գանձասար» ակումբի նախագահ Մաքսիմ Հակոբյանը:

«Cronimet Mining AG» գերմանական ընկերությանն է պատկանում Հայաստանի Սյունիքի մարզի «Զանգեզուրի պղնձամոլիբդենային կոմբինատ» ՓԲԸ-ի բաժնետոմսերի 60 տոկոսը: -0-