Արթուր Աբրահամը և Վիկ Դարչինյանը Հայրենիքին մատուցած ծառայությունների համար մեդալով են պարգևատրվել

ԵՐԵՎԱՆ, 17 սեպտեմբերի. /Նովոստի-Արմենիա/. ՀՀ նախագահ Սերժ Սարգսյանը համաշխարհային ճանաչում ունեցող հայազգի հայտնի բռնցքամարտիկներ Արթուր Աբրահամին (Ավետիք Աբրահամյան) և Վիկ (Վախթանգ) Դարչինյանին պարգևատրել է «Հայրենիքին մատուցած ծառայությունների համար» առաջին աստիճանի մեդալով, հաղորդում է հայկական պետության ղեկավարի մամուլի ծառայությունը:

Նախօրեին անձամբ նախագահ Սարգսյանից մարզիկները պարգևներ են ստացել Հայ Առաքելական Եկեղեցու հոգևորականների, մտավորականության և մարզական ոլորտի ներկայացուցիչների ընդունելության ժամանակ՝ հանրապետության անկախության 20-ամյակի առթիվ:

Աբրահամը և Դարչինյանը մեդալներով են պարգևատրվել ֆիզիկական կուլտուրայի և սպորտի զարգացման գործում ներդրած նշանակալի ավանդի, ֆուտբոլի ասպարեզում ունեցած մեծ հաջողությունների, ձեռք բերած մարզական փայլուն նվաճումների համար:
Հայազգի Արթուր Աբրահամը (Ավետիք Աբրահամյան) հանդես է գալիս Գերմանիայի դրոշի ներքո։ Նա աշխարհի չեմպիոնի տիտղոսն է կրել IBF վարկածով միջին քաշային կարգում 2005-2009 թվականներին։

Վիկ Դարչինյանը IBF, WBA, WBC և IBO վարկածներով աշխարհի բազմակի չեմպիոն է, IBF, WBA և WBC վարկածով թեթև քաշային կարգում աշխարհի բացարձակ չեմպիոն (41 մրցապայքար, 38 հաղթանակ):

«Հայաստան և աշխարհ» պրոֆեսիոնալ բռնցքամարտի երեկոյի շրջանակներում սեպտեմբերի 3-ին կայացած Դարչինյան-Մբամբա մրցապայքարն ավարտվել է հայ բռնցքամարտի անվերապահ հաղթանակով։ Մրցապայքարը 12 ռաունդ է տևել՝ «Կատաղի ցուլը» հաղթեց միավորների շնորհիվ, այդ կերպ պաշտպանելով IBO վարկածով աշխարհի առաջնության չեմպիոնի տիտղոսը: -0-