Եվրո-2012-ի ընտրական փուլի շրջանակներում հոկտեմբերի 7-ին կայանալիք Հայաստան-Մակեդոնիա խաղը շատ դժվար է լինելու, ուրբաթ լրագրողներին ասաց Հայաստանի հավաքականի գլխավոր մարզիչ Վարդան Մինասյանը:
«Ինձ համար զարմանալի է մակեդոնացիների կողմից խմբում զբաղեցրած տեղը, քանի որ իմ նայած բոլոր խաղերում, բացի սլովակների հետ խաղից (որի արդյունքում Մակեդոնիան 0:1 հաշվով պարտություն է կրել), նրանք չէին զիջում մրցակցին», - ասաց Մինասյանը: Նրա խոսքով՝ Մակեդոնիայի հավաքականը բավականին ուժեղ թիմ է:
Խոսելով հայկական հավաքականի խաղի մասին՝ մարզիչը նշեց, որ նրա սաները փորձ են հավաքում ամեն խաղից հետո:
Նա նշեց, որ այսօր թիմում խաղում են չորս «գոլ խփող» ֆուտբոլիստներ, ինչով էլ պայմանավորված է հավաքականի բարձր արդյունքը (17 միավոր ութ խաղում):
Նրա խոսքով՝ մակեդոնացիների հետ խաղում գլխավոր խնդիրը որոշ խաղացողների վնասվածքներն են:
Մինասյանը կարծում է, որ հարկավոր է լուծել խաղացողների ֆունկցիոնալ պատրաստվածության հետ կապված հարցերը:
Հայ ֆուտբոլիստները 14 միավոր են հավաքել և մեկ միավորով զիջում են երկրորդ տեղը զբաղեցրած իռլանդացիներին։ 17 միավորով խմբի միանձնյա առաջատարը ռուսներն են։
Սլովակները նույնպես 14 միավոր ունեն, բայց նրանք զիջում են հայ ֆուտբոլիստներին անմիջական հանդիպումների արդյունքներով:
Մակեդոնացիներն Անդորրայի նկատմամբ նվազագույն 1։0 հաշվով տարած այսօրվա հաղթանակից հետո 7 միավոր են հավաքել և զբաղեցնում են հինգերորդ տեղը։ Անդորրացիները, տանուլ տալով իրենց բոլոր հանդիպումները, փակում են մրցաշարային աղյուսակը։ Բոլոր թիմերն ութական հանդիպում են խաղացել։ Միաժամանակ հայ ֆուտբոլիստները խփած և բաց թողած գնդակների լավագույն տարբերությունն ունեն՝ -17-7։
Հոկտեմբերի 7-ին հայ ֆուտբոլիստները մակեդոնացիների հետ սեփական հարկի տակ հանդիպում կանցկացնեն։ Հոկտեմբերի 11-ին Իռլանդիայում, հնարավոր է, հայ և իռլանդացի ֆուտբոլիստների միջև որոշիչ հանդիպում անցկացվի։
Ընտրական խմբի ռմբարկուների առաջին հնգյակում են չորս հայ ֆուտբոլիստներ՝ չորսական գոլ են խփել Հենրիխ Մխիթարյանը, Յուրա Մովսիսյանն ու Գևորգ Ղազարյանը, երեք գոլի հեղինակ է դարձել Մարկոս Պիզելին:-0-
