Եվրո-2012 ընտրական փուլի մրցաշարում Սլովակիայի նկատմամբ ջախջախիչ հաղթանակից հետո ֆուտբոլի Հայաստանի հավաքականի գլխավոր մարզիչ Վարդան Մինասյանը խոստովանել է, որ իր սաներից նման վառ խաղ չէր ակնկալում, հաղորդում է Սլովակիայի Ֆուտբոլի միության պաշտոնական կայքը։
Երեքշաբթի Ժիլինայում կայացած խաղն ավարտվել է Հայաստանի հավաքականի խոշոր հաղթանակով՝ 4։0 հաշվով։
«Մենք Ժիլինա էինք եկել հաղթանակի համար, բայց ես չէի ակնկալում, որ այն այսքան վառ կստացվի։ Սլովակները միշտ պաշտպանվելու ունակությամբ և լավ կազմակերպվածությամբ են փայլել։ Մեր տղաներն այսօր իսկապես գերազանց խաղացին, և ես շատ հպարտ եմ նրանցով։ Գիտակցում եմ, որ մենք եզրափակիչ դուրս գալու համար ենք խաղում։ Այժմ առաջին հերթին մենք պետք է վերլուծենք սլովակների հետ անցկացրած խաղը, իսկ այնուհետև պատրաստվենք Մակեդոնիայի հետ հանդիպմանը»,- պատմել է Մինասյանը, հաղորդում է «ՌԻԱ Նովոստին»։
Ֆուտբոլի Հայաստանի հավաքականը երրորդ տեղն է զբաղեցնում Եվրո-2012 «В» ընտրական խմբում՝ 4։0 հաշվով սլովակների հանդեպ տարած սենսացիոն հաղթանակից հետո՝ պահպանելով մրցաշարի եզրափակիչ դուրս գալու իրական հնարավորությունները։
Հայ ֆուտբոլիստները 14 միավոր են հավաքել և մեկ միավորով զիջում են երկրորդ տեղը զբաղեցրած իռլանդացիներին։ 17 միավորով խմբի միանձնյա առաջատարը ռուսներն են։
Սլովակները նույնպես 14 միավոր ունեն, բայց նրանք զիջում են հայ ֆուտբոլիստներին անմիջական հանդիպումների արդյունքներով։
Մակեդոնացիներն Անդորրայի նկատմամբ նվազագույն 1։0 հաշվով տարած այսօրվա հաղթանակից հետո 7 միավոր են հավաքել և զբաղեցնում են հինգերորդ տեղը։ Անդորրացիները, տանուլ տալով իրենց բոլոր հանդիպումները, փակում են մրցաշարային աղյուսակը։ Բոլոր թիմերն ութական հանդիպում են խաղացել։ Միաժամանակ հայ ֆուտբոլիստները խփած և բաց թողած գնդակների լավագույն տարբերությունն ունեն՝ -17-7։
Հոկտեմբերի 7-ին հայ ֆուտբոլիստները մակեդոնցիների հետ սեփական հարկի տակ հանդիպում կանցկացնեն։ Հոկտեմբերի 11-ին Իռլանդիայում, հնարավոր է, հայ և իռլանդացի ֆուտբոլիստների միջև որոշիչ հանդիպում անցկացվի։ --0--
