«Կատաղի ցուլ» Դարչինյանը և Մբամբան կշռվել են Երևանում կայանալիք մրցապայքարից առաջ

Պրոֆեսիոնալ բռնցքամարտիկներ Վիկ Դարչինյանի և նրա հակառակորդ հարավաֆրիկացի Էվանս Մբամբայի կշռման ընթացակարգը կայացել է հինգշաբթի Երևանում։

BF, WBA, WBC և IBO վարկածներով աշխարհի ութակի չեմպիոն, IBF, WBA և WBC վարկածներով գերթեթև քաշային կարգում աշխարհի բացարձակ չեմպիոն Դարչինյանը (40 մրցապայքար, 37 հաղթանակ) սեպտեմբերի 3-ին Երևանում 12 ռաունդով մենամարտ կանցկացնի հարավաֆրիկացի Էվանս Մբամբայի դեմ (19 մրցապայքար, 18 հաղթանակ):

Մրցապայքարն անցկացվում է «Հայաստանն ընդդեմ աշխարհի» պրոֆեսիոնալ բռնցքամարտի երեկոյի շրջանակներում: Հակառակորդի ընտրությունն իրականացվել է Բռնցքամարտի միջազգային կազմակերպության (IBO) կողմից, քանի որ այդ մրցապայքարում նա պետք է պաշտպանի IBO վարկածով չեմպիոնական գոտին:

Կշռման արդյունքում պարզ դարձավ, որ Դարչինյանը (53,5 կգ) 600 գրամով ծանր է իր հակառակորդից։ Նման շոուների ավանդույթի համաձայն, դրանից հետո բռնցքամարտիկները դեմ առ դեմ են կանգնում։
Բռնցքամարտի երեկոն կսկսվի 19։00-ին։

Նախօրեին մամուլի ասուլիսի ժամանակ Դարչինյանը հայտնել էր, որ, անկասկած, հաղթանակի է տրամադրված՝ հանդիսատեսին իրական շոու խոստանալով։ Նա նաև բարձր էր գնահատել իր հակառակորդի քաջությունը, որ համաձայնվել է իր հետ մրցելու։ -0-