Հայ շախմատիստ Զավեն Անդրիասյանը զբաղեցրել է 4-րդ տեղը Չինաստանում ավարտված համաշխարհային ուսանողական խաղերում

Հայաստանցի շախմատիստ Զավեն Անդրիասյանը զբաղեցրել է չորրորդ տեղը Չինաստանի Շենժեն քաղաքում ավարտված 26-րդ համաշխարհային ուսանողական խաղերի շրջանակներում անցկացված շախմատային առաջնության արդյունքներով, հաղորդում է armchess.am-ը:

Անդրիասյանը վաստակել է 6,5 միավոր: Հրանտ Մելքումյանն ու Ավետիք Գրիգորյանը, ովքեր 6-ական միավոր են վաստակել, զբաղեցրել են համապատասխանաբար 8-րդ և 9-րդ տեղերը:

Գրոսմայստեր Լի Չաոն (Չինաստան) 8,5 միավորով հաղթել է մրցաշարում:

Աղջիկների մրցաշարում առաջին մրցանակը 7 միավորով նվաճել է գրոսմայստեր Թան Ժոնգին (Չինաստան):

Հայ շախմատիստուհիներ, միջազգային վարպետներ Աննա Հայրապետյանը և Կարինա Համբարձումովան վաստակել են 5,5 և 5 միավոր և գրավեցին համապատասխանաբար 20-րդ և 21-րդ տեղերը:

26-րդ համաշխարհային ուսանողական խաղերում հայաստանցի մարզիկները հանդես են եկել 5 մարզաձևում` շախմատ, ծանրամարտ, թեքվանդո, ձյուդո, թենիս:

Հայ ուսանող-մարզիկները մասնակցում են ուսանողական խաղերին արդեն 10-րդ անգամ՝ մինչ այժմ նվաճելով երեք արծաթե և 11 բրոնզե մեդալ:

Ծանրամարտիկ Աղասի Աղասյանը նվաճել է ոսկե մեդալ` դառնալով այս խաղերում ոսկե մեդալակիր առաջին հայ մարզիկը:-0-