«Կատաղի ցուլ» Դարչինյանն իր հակառակորդ Մբամբային լավ մարզիկ է համարում

«Կատաղի ցուլ» մականունով IBO վարկածով թեթև քաշային կարգում աշխարհի չեմպիոն Վիկ (Վախթանգ) Դարչինյանը հինգշաբթի մամուլի ասուլիսի ժամանակ հայտնեց, որ չի պատրաստվում թերագնահատել իր հակառակորդին՝
հարավաֆրիկացի Էվանս Մբամբային (Evans Mbamba) և նրան լավ մարզիկ է համարում:

Դարչինյան-Մբամբա մրցապայքարը տեղի կունենա սեպտեմբերի 3-ին Երևանի Կարեն Դեմիրճյանի անվան մարզահամերգային համալիրում: Սա նման մակարդակի առաջին մենմարտն է, որն անցկացվում է Հայաստանում:

«Իհարկե, Մբամբան կցանակա ինձ ցույց տալ, թե որքան է ինքն ուժեղ: Ես ուզում եմ ասել, որ այդ մենամարտին հենց այնպես չեմ վերաբերվում...Պետք է այնպես վերաբերվել մրցապայքարին, որպեսզի չթուլանաս»,- նշեց հայ բռնցքամարտիկը:

Դարչինյանն ավելացրեց, որ նախորդ մենամարտերում ինքը հաղթել է նրան, ում հետ պայքարում Մբամբան պարտվել է, «բայց դա ոչինչ չի նշանակում»:

ԽՍՀՄ և ՀՀ վաստակավոր մարզիչ, Վիկ Դարչինյանի անձնական մարզիչ Վարդան Թադևոսյանը նշեց, որ երևանյան մենամարտին պատրաստվելիս՝ Դարչինյանը երեք շաբաթ առաջ Ծաղկաձորում ուսումնամարզական հավաքներ է անցկացրել:

«Իր մարզումները Վախթանգը սկսել է դեռ երկու ամիս առաջ Ավստրալիայում: Նրա տրամադրությունը շատ բարձր է, մարզումներն անցկացնում է նոր ոգևորությամբ, ոչ մի խնդիր չկա»,- ասաց նա:

Թադևոսյանն ավելացրեց, որ օգոստոսի 20-ին Դարչինյանը Ծաղկաձորից Երևան կժամանի, որպեսզի հարմարվի երևանյան կլիմային:

Իր պրոֆեսիոնալ կարիերայի ընթացքում 35-ամյա Դարչինյանը 40 մրցապայքար է անցկացրել՝ միայն երեք պարտություն գրանցելով:

29-ամյա Մբամբայի ակտիվում 19 մրցապայքար է գրանցված, որոնցից միայն մեկն է պարտությամբ ավարտել: -0-