IBO վարկածով գերթեթև քաշային կարգի աշխարհի չեմպիոն Վիկ Դարչինյանը հարավաֆրիկացի բռնցքամարտիկ Էվանս Մբամբայի (Evans Mbamba) հետ մենամարտում իր հաղթանակը կնվիրի Հայաստանի և Լեռնային Ղարաբաղի Հանրապետությունում հռչակված անկախության 20-ամյակին։
Դարչինյան-Մբամբա մարտը կանցկացվի սեպտեմբերի 3-ին՝ Երևանի Կարեն Դեմիրճյանի անվան ՄՀՀ-ում։ Սա նման մակարդակի առաջին մարտն է, որ անցկացվում է Հայաստանում։
«Անշուշտ, շատ մեծ դժվարություններ եղան Հայաստանում այդ մարտի կազմակերպման կապակցությամբ։ Առայսօր ինձ ամեն օր զանգահարում են Բռնցքամարտի ամերիկյան ֆեդերացիայից հակառակորդի ներկայացուցիչները՝ ամեն անգամ նոր պահանջներ ներկայացնելով։ Բայց ամեն ինչ լավ է ընթանում, պատրաստ ենք հյուրեր ընդունել»,- հինգշաբթի մամուլի ասուլիսի ժամանակ ասաց Դարչինյանը։
Բռնցքամարտիկի խոսքո՝ բռնցքամարտի ամերիկյան ֆեդերացիայի հիմնական պահանջները վերաբերում են մարտի ժամանակ անվտանգության ապահովմանը և բժիշկների առկայությանը։
«Մեծ թվով հյուրեր կունենանք, նրանք ցանկանում են տեսնել, թե ինչպես է այդ ամենը կատարվելու Հայաստանում, ցանկանում են ծանոթանալ տեղանքին, մթնոլորտին, կազմակերպման որակին։ Հուսով եմ, որ բավարարված կլինեն։ Կարծում եմ, սա լավ սկիզբ է Հայաստանի համար։ Այս մարտը ես կապում եմ Հայաստանի պրոֆեսիոնալ բռնցքամարտի ապագայի հետ»,- նշեց նա։
Դարչինյանը հայտնեց նաև, որ Հայաստան ժամանող հատուկ հյուրերի թվում կլինեն, մասնավորապես, միջազգային մակարդակի բռնցքամարտի այնպիսի աստղեր, ինչպես Կոստյա Դզյուն, Վալուևը, Կարո Մուրադը, Վանես Մարտիրոսյանը։
Մարզիկը նշեց, որ մարտի կազմակերպմանը ծախսվել է մոտ 1 մլն դոլար։ «Շատ շնորհակալ եմ մեր հովանավորներին՝ Հովիկ Հովսեփյանին, Արա Աբրահամյանին, Հայաստանի ԱՕԿ-ին, ինչպես նաև հանրապետության նախագահ Սերժ Սարգսյանին, ում հետ խոսել եմ մեկուկես ամիս առաջ և թուլտվություն խնդրել այդ միջոցառման համար։ Իր թույլտվությամբ նա օրհնեց ինձ»,- ասաց Դարչինյանը։ --0-
