Լիտվացիներն օբյեկտիվորեն ուժեղ էին. Հայաստանի հավաքականի ֆուտբոլիստ Պիցելի

Լիտվայի հավաքականի ֆուտբոլիստներն իրենց դաշտում օբյեկտիվորեն ուժեղ էին Հայաստանի հավաքականից, «Ռ-Սպորտ»-ի թղթակցին է հայտնել Դոնեցկի «Մետալուրգի» և հայկական թիմի կիսապաշտպան Մարկոս Պիցելին։

Հայաստանի հավաքականը 0։3 հաշվով զիջել է Լիտվայի հավաքականին։ Ազգային հավաքականում 2008 թվականի մայիսի 22-ին Մոլդավիայի հետ խաղում առաջին անգամ հանդես եկած բրազիլահայ Պիցելին Կաունասի մարզադաշտում դուրս է եկել մեկնարկային կազմում, խաղի ընթացքում մի քանի վտանգավոր պահ է ստեղծել լիտվացի դարպասապահ Ժիդրունաս Կարչեմարկասի համար։

«Հակառակորդը մեզանից ուժեղ էր,- խոստովանեց Պիցելին։ - Այնուամենայնիվ, ամեն ինչ այդքան էլ տխուր չէ, որովհետև բացթողած արագ գոլից հետո մարզիչների շտաբը որոշում ընդունեց հնարավորություն տալ երիտասարդ ֆուտբոլիստներին՝ իրենց դրսևորելու համար, խաղի ընթացքում չորս փոխարինում կատարվեց։ Լիտվայի հետ խաղը պետք էր մեր թիմին որպես փորձարարական, և ոչ վարկանիշային, այդ պատճառով արդյունքը մղվեց երկրորդ պլան»։

Հայաստանի հավաքականի կիսապաշտպանը նշեց, որ, լիտվացիների հետ խաղում սխալներ թույլ տալով, հայկական հավաքականի ֆուտբոլիստները բացահայտեցին իրենց թույլ տեղերը, որոնք պետք է «կարկատեն» մինչև հաջորդ կարևոր խաղը՝ Անդորրայի հետ Եվրո-2012 ընտրական փուլում։

Խմբում պայքարը, Պիցելիի խոսքով, դեռ շարունակվում է։ «Թեև խմբից դուրս գալու մեր հնարավորությունները, անկեղծ ասած, այդքան էլ մեծ չեն, Հայաստանի հավաքականը կպայքարի մինչև վերջ, - սա խոստանում եմ,- ասաց նա։ - Ռուսների հետ վերջին ոչ-ոքին մեզ վստահություն ավելացրեց, և հանձնվել չենք պատրաստվում։ Խոսելով Ռուսաստանի հավաքականի մասին՝ կարծում եմ, որ այդ թիմը դուրս կգա Եվրոպայի եզրափակիչ»։
Հայաստանի հավաքականը սեպտեմբերի 2-ին կխաղա Անդորրայի թիմի հետ՝ Եվրո-2012 ընտրական փուլի շրջանակներում։ -0-