Էլինա Դանիելյանը զիջել է չինացի շախմատիստուհուն ՖԻԴԵ-ի կանանց Գրան պրի մրցաշարում

Հայ գրոսմայստեր Էլինա Դանիելյանը նախօրեին պարտվել է չինացի Ժուան Լուֆեյին Դոնի Ռոստովում անցկացվող Շախմատի միջազգային ֆեդերացիայի (ՖԻԴԵ) կանանց Գրան պրի երկրորդ շարքի առաջին փուլի երկրորդ տուրում,  հաղորդում է armchess.am-ը։

Անընդմեջ երկրորդ հաղթանակից հետո մրցաշարի առաջատարը դարձավ շախմատի աշխարհի ներկայիս չեմպիոնուհի Հոու Իֆանը, ով հաղթել է ռուս Ալիսա Գալյամովային։ Ռուս շախմատիստուհի Նադեժդա Կոսինցևան հաղթանակ է տարել իր հայրենակից Եկատերինա Կովալևսկայայի նկատմամբ։

Տատյանա Կոսինցևա (Ռուսաստան) – Աննա Մուզիչուկ (Սլովենիա), Եկատերինա Լագնո (Ուկրաինա) – Ալեքսանդրա Կոստենյուկ (Ռուսաստան) ու Անտուանետա Ստեփանովա (Բուլղարիա) – Համպի Կոներու (Հնդկաստան) պարտիաներն ավարտվել են ոչ-ոքի։

Խաղի առաջին երկու օրերից հետո երկու միավորով առաջատար է Հոու Իֆանը, երկրորդ տեղը կիսում են Նադեժդա Կոսինցևան, Ժուան Լուֆեյը և Լագնոն, ովքեր ունեն 1,5-ական միավոր։ Մեկական միավոր են հավաքել Կոստենյուկը, Տ.Կոսինցևան, Մուզիչուկը, Ստեֆանովան, կես միավորով պակաս են հավաքել Կոներուն, Դանիելյանը, Կովալևսկայան։ Մրցաշարային աղյուսակը եզրափակում է Գալյամովան զրոյական արդյունքով։

Ռոստովի մրցաշարն անցկացվում է օգոստոսի 2-14-ը շրջանային համակարգով։ Այնուհետև մրցումները կշարունակվեն Շենչժենում, Նալչիկում և Կազանում, Ջերմուկում և Ստամբուլում։
Շարքի յուրաքանչյուր փուլի մրցանակային ֆոնդը 40 հազար եվրո է, ևս 60 հազար կխաղարկվի բոլոր ռաունդների համագումարով։ Գրան պրիի հաղթողը 2013 թվականին աշխարհի չեմպիոնուհու կոչման համար խաղ անցկացնելու իրավունք կստանա։

ՖԻԴԵ-ի Գրան պրիի առաջին հաղթող է եղել աշխարհի ներկայիս չեմպիոնուհի Հոու Իֆանը։ -0