Հայաստանի նախագահը մտադիր է «Զվարթնոց» օդանավակայանում դիմավորել շախմատի աշխարհի չեմպիոններին

Հայաստանի նախագահ Սերժ Սարգսյանը, ով նաև Շախմատի ֆեդերացիայի նախագահն է, հավանաբար, կդիմավորի շախմատի աշխարհի չեմպիոններին «Զվարթնոց» օդանավակայանում, «Նովոստի-Արմենիա» գործակալությանը հայտնեցին Հայաստանի շախմատի ակադեմիայից։

Հայ շախմատիստներն առաջին անգամ պատմության մեջ «ոսկի» նվաճեցին Չինաստանում անցկացվող շախմատի թիմային առաջնությունում։

Հայ չեմպիոնների վերադարձին են սպասում բազմաթիվ երկրպագուներ, ակնկալվում է, որ օդանավակայանում նրանց կդիմավորեն պաշտոնատար անձինք, իսկ երեկոյան Երևանի Հանրապետության հրապարակում նրանց պատվին հանդիսավոր համերգ կանցկացվի հայկական էստրադայի աստղերի մասնակցությամբ։

Ավելի վաղ հաղորդվել է, որ Հայաստանի հավաքականը վայրէջք կկատարի տեղական ժամանակով ժամը 15։00-ին, բայց ավելի ուշ պարզվեց, որ հայ չեմպիոնները կժամանեն տեղական ժամանակով ժամը 22։15-ին։

«Երեկվա տվյալներով, նախագահը պատրաստվում էր դիմավորել շախմատիստներին օդանավակայանում ժամը 15։00-ին։ Չվերթը հետաձգվեց, բայց չենք կարծում, թե պետության ղեկավարը փոխել է իր մտադրությունը»,- հայտնեցին Շախմատի ակադեմիայից։

Հայաստանը Համաշխարհային շախմատային օլիմպիադայի երկակի հաղթող է։ Ընդ որում՝ ինտելեկտուալ խաղի հայ վարպետները տիտղոսակիր են դարձել երկու անգամ անընդմեջ 2006 թվականին՝ Թուրինում, և 2008 թվականին՝ Դրեզդենում։ -0-