ՈՒԵՖԱ-ն Եվրոպայի լավագույն ֆուտբոլիստի մրցանակ է սահմանել

Այս տարվանից Եվրոպական ֆուտբոլային ասոցիացիաների միությունը (ՈՒԵՖԱ) մրցանակ է հանձնելու Եվրոպայում անցկացվող ֆուտբոլային սեզոնի արդյունքում լավագույնը ճանաչված խաղացողին, հաղորդում է կազմակերպության պաշտոնական կայքը։

Նման որոշումն ընդունվել է ՈՒԵՖԱ-ի ղեկավար Միշել Պլատինիի և European Sports Magazines (ESM) եվրոպական մարզական մամուլի ասոցիացիայի նախաձեռնությամբ, հաղորդում է ՌԻԱ Նովոստին։

Նոր մրցանակի թեկնածու կարող է դառնալ ցանկացած խաղացող՝ անկախ  ազգությունից, ով ներկայացնում է ֆուտբոլային ասոցիացիայի ակումբը, որը անցած սեզոնի ընթացքում ՈՒԵՖԱ-ի անդամ է եղել։ Խաղացողները կգնահատվեն 2010-2011 սեզոնի ընթացքում ակումբների և հավաքականների մակարդակում ունեցած ներքին և միջազգային հանդիպումների ժամանակ ունեցած ելույթների համաձայն։

Ժյուրիի կազմը կձևավորվի 53 հայտնի մարզական լրագրողներից, որոնցից յուրաքանչյուրը կներկայացնի իր երկրի ֆուտբոլային ասոցիացիան, որը մտնում է ՈՒԵՖԱ-ի մեջ։ Սկզբում յուրաքանչյուր լրագրող երեք թեկնածու կընտրի և կբաշխի նրանց հետևյալ կերպ՝ լավագույնը կստանա 5 միավոր, երկրորդը՝ 3, երրորդը՝ 1։ Առավելագույն քանակությամբ միավոր ունեցող երեք խաղացողները կանցնեն քվեարկության եզրափակիչ փուլ։

Երեք թեկնածուների անունները հայտնի կդառնան հուլիսի 25-ին։ Հաղթողը կորոշվի օգոստոսի 25-ին կայանալիք քվեարկության էլեկտրոնային համակարգի օգնությամբ, երբ Մոնակոյում կանցկացվի Չեմպիոնների լիգայի խմբակային փուլի վիճակահանությունը։ -0-