Աբրահամը Երևանի բռնցքամարտի դպրոցին 100 հազար եվրո արժողությամբ մարզական գույք կնվիրի

ԵՐԵՎԱՆ, 17 հունիսի. /Նովոստի-Արմենիա/. Հայտնի բռնցքամարտիկ, միջին քաշային կարգում աշխարհի նախկին չեմպիոն Արթուր Աբրահամը մտադիր է Երևանի Վլադիմիր Ենգիբարյանի անվան բռնցքամարտի մարզական դպրոցին Adidas ֆիրմայի մարզական գույք նվիրել՝ 100 հազար եվրո արժողությամբ:

«Այս նվերով ես չեմ ցանկանում գովազդել ինձ կամ շոու սարքել, ես պարզապես ցանկանում եմ իմ երախտագիտությունը հայտնել հարազատ դպրոցին», - ուրբաթ Երևանում մամուլի ասուլիսի ժամանակ հայտարարեց Աբրահամը:

Նրա խոսքով՝ բեռի մի մասն արդեն Հայաստանում է և արդեն հաջորդ շաբաթ կփոխանցվի դպրոցին, մնացած մասը կտեղափոխվի առաջիկայում:

Աբրահամը նշեց, որ Հայաստանում այսօր շատ լավ բռնցքամարտիկներ և մարզիչներ կան, սակայն պրոֆեսիոնալ բռնցքամարտը երկրում դեռ բավարար կերպով զարգացած չէ, այդ պատճառով շատ մարզիկների չի հաջողվում հաջողության հասնել:

Արթուր Աբրահամը կմնա Հայաստանում 2-3 շաբաթ, ինչից հետո կվերադառնա Գերմանիա, որտեղ կպատրաստվի որակավորման մենամարտերին:-0-