Աբրահամը պատրաստվում է երկրորդ միջին քաշային կարգում աշխարհի չեմպիոն դառնալ

ԵՐԵՎԱՆ, 17 հունիսի. /Նովոստի-Արմենիա/. Միջին քաշային կարգում աշխարհի նախկին չեմպիոն Արթուր Աբրահամը պատրաստվում է փոխել իր քաշային կարգն ու աշխարհի չեմպիոն դառնալ երկրորդ միջին քաշային կարգում:

«Ես 2-3 որակավորման մենամարտ կանցկացնեմ, ինչից հետո 2012 թ.-ի կեսերին կամ վերջին կկարողանամ հավակնել չեմպիոնի տիտղոսին», - ուրբաթ Երևանում մամուլի ասուլիսի ժամանակ ասաց Աբրահամը:
Նա նշեց, որ դեռևս չգիտի մրցակիցների անուններ և ավելացրեց, որ որակավորման առաջին մենամարտը տեղի կունենա մոտավորապես 3-3,5 ամիս անց:

Աբրահամն անդրադարձավ նաև իր վերջին մենամարտին, երբ մայիսի 15-ին Կալիֆոռնիայում կայացած Super Six մրցաշարի կիսաեզրափակիչ մենամարտում նա միավորների տարբերությամբ պարտվեց օլիմպիական չեմպիոն, երկրորդ միջին քաշային կարգում WBA վարկածով չեմպիոն Անդրե Ուորդին (ԱՄՆ):

Նախկին չեմպիոնի խոսքով՝ պարտությունը պայմանավորված էր նրա մարտավարական սխալով:
«Ես շատ լավ սկսեցի մենամարտը, սակայն չորրորդ ռաունդում մարտավարական սխալ թույլ տվեցի: Պարզապես պաշտպանվում էի՝ հույս ունենալով վերջում նոկաուտի ենթարկել Ուորդին, սակայն, ցավոք, չստացվեց, և մրցակիցը հաղթեց միավորների առավելությամբ», - ասաց նա:

Աբրահամն ավելացրեց, որ չի պատրաստվում մեղադրել ուրիշներին սեփական սխալի հարցում: «Իհարկե, դժվար է, երբ տանը չես մրցում, կա ժամանակի տարբերություն, որին դժվար է ընտելանալ, սակայն պրոֆեսիոնալ բռնցքամարտիկը չպետք է արդարացում փնտրի», -  հայտարարեց բռնցքամարտիկը:

Նա ասաց, որ պատրաստվում է 2-3 շաբաթ մնալ Հայաստանում, ինչից հետո կվերադառնա Գերմանիա, որտեղ կպատրաստվի որակավորման մենամարտերին:
Արթուր Աբրահամը (Ավետիք Աբրահամյան) ծնվել է Հայաստանում, հանդես է գալիս Գերմանիայի դրոշի ներքո:-0-