ՌԴ հավաքականի ֆուտբոլիստները կհաղթեն Հայաստանին Եվրո-2012-ի ընտրական փուլի հանդիպման ժամանակ, եթե խաղան ինքնանվիրումով, «Р-Спорт» գործակալությանն է ասել Ռուսաստանի ֆուտբոլային միության (ՌՖՄ) պատվավոր նախագահ Վյաչեսլավ Կոլասկովը:
Ընտրական «B» խմբի շրջանակներում հանդիպումը տեղի կունենա հունիսի 4-ին Սանկտ Պետերբուրգի «Պետրովսկի» մարզադաշտում: Մարտի վերջին Երևանում Հայաստանի և Ռուսաստանի հավաքականները խաղացին ոչ-ոքի (0:0), հաղորդում է ՌԻԱ Նովոստին:
«Ես չեմ կասկածում, որ մենք վաղը կհաղթենք: Եթե հաշվի առնենք օբյեկտիվ համեմատական բնութագրերը, ապա կասկած չկա, որ մեր թիմն ավելի ուժեղ է, ավելի փորձառու և ավելի վարպետացած: Սակայն ինչպես ցույց տվեց առաջին հանդիպումը, ոչ միայն վարպետությունն ու փորձն են որոշում ելքը, հարկավոր է նաև դրսևորել բնավորության այնպիսի գծեր, ինչպիսիք են վճռականությունը, մարտունակությունը, ինքնանվիրման պատրաստ լինելը: Առաջին խաղում այդ որակները չէին երևում: Եթե այդ վարպետությանն ավելանա նաև շարժունակությունը, ապա մենք կհաղթենք հայերին, սակայն թիմը պետք է խաղա հնարավորին չափ լավ», - հեռախոսազրույցի ընթացքում ասել է Կոլոսկովը:
Երևանում տեղի ունեցած արտագնա խաղի ոչ-ոքի արդյունքի բոլոր պատճառները Կոլոսկովը չի կարողացել ասել, սակայն ընդգծել է իր կարծիքով ամենակարևորը: «Բոլոր պատճառները կարող է ասել նա, ով թիմի ներսում է: Սակայն պատճառներից մեկը պարզապես մրցակցին թերագնահատելն է: Մենք վարպետներ ենք, Եվրոպայի առաջնության մեդալակիրներ, իսկ ովքե՞ր են հայերը: Դատողության նմանատիպ տրամաբանությունը գոյության իրավունք ունի: Ինձ համար անհասկանալի է, թե իրականում ի՞նչ է այնտեղ տեղի ունեցել, ինչու՞ թիմն այդքան իներտ խաղաց, իսկ ոմանք ընդհանրապես խաղից դուրս էին», - նշել է գործակալության զրուցակիցը:
Կոլոսկովն ընդգծել է, որ ֆուտբոլիստները պետք է հասկանան, որ Եվրո-2012-ի ընտրական փուլի հանդիպման ժամանակ բացառապես վարպետության հաշվին շատ դժվար է հաղթել նույնիսկ ոչ այնքան հայտնի թիմերին: «Չի ստացվի հաղթել միայն վարպետության շնորհիվ, առանց ջանք գործադրելու: Պետք է ջանք գործադրել և աշխատել», - պարզաբանել է նա:
Մասնագետը նաև ավելացրել է, որ հուսով է, որ ազգային հավաքականի ֆուտբոլիստները գիտակցում են ողջ պատասխանատվությունը, որը ընկած է նրանց վրա: «Կարծում եմ, որ Երևանում տեղի ունեցած հանդիպման նման հանդիպում չի լինի», - եզրափակել է Կոլոսկովը:-0-
