ԵՐԵՎԱՆ, 17 մայիսի. /Նովոստի-Արմենիա/. Հայ բռնցքամարտիկ, IBO վարկածով աշխարհի չեմպիոն Վիկ (Վախթանգ) Դարչինյանը հայտարարեց, որ կոլումբիացի Յոնի Պերեսի նկատմամբ տարած հաղթանակով նա անձնական ավանդն է ներդրել 1915 թվականին Օսմանյան կայսրությունում Հայոց ցեղասպանության միջազգային ճանաչման գործում։
Պերեսի հետ ապրիլի 23-ին՝ Հայոց ցեղասպանության զոհերի հիշատակի օրվա նախօրեին, անցկացված մենամարտում Դարչինյանը նվաճեց IBO վարկածով աշխարհի չեմպիոնի տիտղոսը և իր հաղթանակը նվիրեց Ցեղասպանության զոհերի հիշատակին։ Մենամարտի ժամանակ բռնցքամարտիկի գոտու վրա նշված էր «1915» տարեթիվը։
«Դա մեծ օր էր ինձ համար, և ես կարծում եմ, ողջ աշխարհի հայության համար նույնպես, քանի որ ես դարձա առաջին մարզիկը, ով այս կերպ ներկայացրեց աշխարհին Հայոց ցեղասպանության թեման»,- երեքշաբթի մամուլի ասուլիսի ընթացքում հայտարարեց բռնցքամարտիկը։
Դարչինյանը նշեց, որ մարտից հետո ինքն անգլերեն լեզվով հարցազրույցներ է տվել ավելի քան տասնյակ հեռուստաալիքների, որոնց ժամանակ պատմել է Հայոց ցեղասպանության մասին, և այդ թեման լայնորեն լուսաբանվել է տարբեր ԶԼՄ-ների կողմից։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ։ Առաջինը 1965 թ.-ին ճանաչել է Ուրուգվայը, որի օրինակին են հետևել Ռուսաստանը, Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, ԱՄՆ-ի 42 նահանգները։ Հայոց ցեղասպանությունը ճանաչել են նաև Վատիկանը, Եվրախորհրդարանը, Եկեղեցիների համաշխարհային խորհուրդը։-0-
