Բժիշկներն արել են հնարավոր ամեն ինչ, որպեսզի ծանրամարտի աշխարհի չեմպիոն Նազիկ Ավդալյանը կարողանան վերադառնալ մեծ սպորտ, «Նովոստի-Արմենիա» գործակալությանն ասաց ՀՀ առողջապահության նախարարության մամուլի քարտուղար Շուշան Հունանյանը:
Մարզուհին ապրիլի 26-ի առավոտյան Սպիտակ-Գյումրի ավտոճանապարհի 31-րդ կմ-ում ՃՏՊ-ի է ենթարկվել: Գտնվելով սեփական ավտոմեքենայի ղեկին՝ Ավդալյանին չի հաջողվել կառավարել այն: Հինգշաբթի «Էրեբունի» բժշկական կենտրոնում նա հաջող վիրահատության է ենթարկվել:
«Ավդալյանն իրեն լավ է զգում: Այս կապակցությամբ ավելի հստակ կանխատեսում կանեն մարզական բժիշկները որոշ ժամանակ անց», - նշեց Հունանյանը:
Սա 2011 թ.-ի ընթացքում Ավդալյանի արդեն երկրորդ ավտովթարն է, հունվարի 3-ին Շիրակի մարզիկ Արթիկ քաղաքում մարզուհուն պատկանող Mercedes մակնիշի մեքենան բախվել էր շենքի պատին:
Նազիկ Ավդալյանը 2008 թ.-ին դարձել է Ծանրամարտի Եվրոպայի չեմպիոն, 2009 թ.-ին՝ ծանրամարտի աշխարհի չեմպիոն: 2009 թ.-ի դեկտեմբերին ՀՀ նախագահ Սերժ Սարգսյանը հրամանագիր է ստորագրել Նազիկ Ավդալյանին «Հայրենիքին մատուցած ծառայությունների համար» երկրորդ աստիճանի մեդալով պարգևատրելու մասին, իսկ ՀՀ մարզական լրագրողների ֆեդերացիան ճանաչել է նրան Հայաստանի 2009 թ.-ի լավագույն մարզիկ:-0-
