Իռլանդիայի ֆուտբոլի հավաքականի գլխավոր մարզիչ Ջովանի Տրապատոնին կարծում է, որ իր թիմն ի վիճակի է միավորներով առաջ անցնել Ռուսաստանի հավաքականից և B խմբում զբաղեցնել առաջին տեղը Եվրո-2012-ի ընտրական փուլի արդյունքներով, հաղորդում է PA Sport գործակալությունը:
Շաբաթ օրը իռլանդացիները 2:1 հաշվով պարտության մատնեցին մակեդոնացիներին, իսկ Ռուսաստանի հավաքականը միավոր կորցրեց՝ արտագնա խաղում ոչ-ոքի խաղալով Հայաստանի հավաքականի հետ: Այժմ մրցաշարային աղյուսակը գլխավորում են տասը միավոր վաստակած միանգամից երեք թիմ՝ Ռուսաստանի, Իռլանդիայի և Սլովակիայի հավաքականները:
«Մեր խնդիրը մեծ թվով վնասվածքներն են: Ես չեմ վախենում մրցակիցների հետ խաղերից, այլ միայն անհանգստանում եմ վնասվածքների պատճառով՝ նույնիսկ հաշվի չառնելով այն, որ մենք լավ կազմ ունենք: Միշտ ավելի ապահով է դաշտ հանել լավագույն խաղացողների, և եթե մենք կարողանանք դա անել, ապա կկարողանանք առաջինը դառնալ, ես դրանում համոզված եմ», - ասել է իտալացի մարզիչը, հաղորդում է «ՌԻԱ Նովոստի»:
Հունիսի 4-ին իռլանդացիները կրկին ուժերը կչափեն մակեդոնացիների հետ:
«Եթե մեր թիմը նույն մարզավիճակում լինի, ապա կարծում եմ, որ մենք հաղթանակի լավ հնարավորություններ կունենանք: Հունիսի սկզբին ֆուտբոլիստները 10-ամսյա սեզոն կանցկացնեն և լավ հոգնած կլինեն: Եթե օրինակ Դեմյեն Դաֆը շարունակի դաշտում խաղալ այնպես, ինչպես հիմա է խաղում, ապա նա սեզոնի վերջում հոգնածություն կզգա: Մենք արդել հասկացել ենք, որ մեր թիմն ավելի փորձառու է, ավելի վստահ է, ինչպես նաև փորձում է իրացնել սեփական ներուժը», - ավելացրել է Տրապատոնին:
Ռուսաստանի հավաքականը հունիսի 4-ին սեփական հարկի տակ ուժերը կչափի Հայաստանի ընտրանու հետ: Նախնական տվյալների համաձայն՝ ֆուտբոլային հանդիպումը տեղի կունենա Սանկտ Պետերբուրգում: Սլովակներն այդ օրը սեփական հարկի տակ ուժերը կչափեն Անդորրայի հավաքականի հետ:-0-
