Ռուսաստանի հետ խաղում ՀՀ հավաքականի հաղթանակի հնարավորությունները մեծ են. Բոնդարենկո

ԵՐԵՎԱՆ, 24 մարտի. /Նովոստի-Արմենիա/.  2012թ.-ի Եվրոպայի առաջնության ընտրական խաղում ՌԴ հավաքականին հաղթելու հնարավորությունները չափազանց մեծ են, կարծում է «Արարատ-73» լեգենդար հայկական ֆուտբոլային թիմի պաշտպան, սպորտի վարպետ Սերգեյ Բոնդարենկոն:

2012թ.-ի Եվրոպայի առաջնության ընտրական փուլի շրջանակներում Հայաստանի և Ռուսաստանի հավաքականների խաղը տեղի կունենա մարտի 26-ին Երևանում:

«Ես ողջ կյանքս նվիրել եմ հայկական ֆուտբոլին, և միշտ հաստատել եմ, որ Հայաստանը ֆուտբոլի երկիր է...Պետք է ասեմ, որ ՀՀ հավաքականի նոր սերունդը կարող է լուրջ հետք թողնել ֆուտբոլի պատմության մեջ: Որպես ֆուտբոլիստ, այսօր ես մեծ ուրախությամբ կարող եմ ասել, թե հավատում եմ, որ Հայաստանը կարող է հաղթել ՌԴ հավաքականին»,- հինգշաբթի մամուլի ասուլիսի ժամանակ ասաց Բոնդարենկոն:

Միաժամանակ փորձառու ֆուտբոլիստը երախտագիտություն հայտնեց սպորտի վաստակավոր վարպետ, վաստակավոր մարզիչ, Օլիմպիական խաղերի հաղթող Անատոլի Բիշովցին, ով ՀՀ հավաքականը բնութագրել է որպես երիտասարդության և փորձի համակցում:

Բոնդարենկոն նշեց, որ նման բնութագիրը մարզչի արժանիքն է, ով կարողացել է համախմբել ֆուտբոլիստներին:

Այդ կապակցությամբ «Արարատ-73» թիմի կիսապաշտպան, սպորտի վարպետ Հովհաննես Զանազանյանը նշել է ՀՀ հավաքականի բարձր պրոֆեսիոնալիզմը՝ ընդգծելով, որ ՀՀ հավաքականն իր խաղով կարողացել է մարզադաշտ վերադարձնել ֆուտբոլասերերին:
Ըստ նրա, Հայաստանը լիովին կարող է երկրորդ տեղը զբաղեցնել առաջնության ժամանակ: -0-