Մակգիդին չէր սպասում, որ հայերը կպայքարեն Եվրո-2012-ի ուղեգրի համար

ԵՐԵՎԱՆ, 22 մարտի, /Նովոստի-Արմենիա/. Իռլանդիայի հավաքականի և Մոսկվայի «Սպարտակ» ակումբի կիսապաշտպան Էյդեն Մակգիդին չէր սպասում, որ Հայաստանի ֆուտբոլի հավաքականն այդքան լավ կխաղա Եվրո-2012-ի ընտրական փուլում, հաղորդում է ՈՒԵՖԱ-ի պաշտոնական կայքը:

Հայերը, ովքեր մարտի 26-ին սեփական հարկի տակ ուժերը կչափեն Ռուսաստանի հավաքականի հետ, В խմբում 4 հանդիպման արդյունքում հավաքել են 7 միավոր: Նույնքան միավոր են վաստակել իռլանդացիներն ու սլովակները, 9 միավորով խմբի առաջատարներն են Դիվ Ադվոկատի սաները:

«Մենք շատ բարդ խմբում ենք հայտնվել: Ընտրական փուլի մեկնարկից առաջ ենթադրում էինք, որ դժվար չի լինի Հայաստանի հավաքականի հետ խաղում երեք միավոր վաստակել: Մենք նրանց պարտության մատնեցինք 1:0 հաշվով և մշտապես նշում էինք, որ սա անհաջող արդյունք է: Հետո հայերը շատ միավորներ վաստակեցին և հայտնվեցին մեր կողքին», - նշել է Մակգիդին, հաղորդում է «ՌԻԱ Նովոստին»:

Իռլանդացի ֆուտբոլիստի խոսքերով՝ Ռուսաստանի հավաքականը խմբի ֆավորիտն է առաջին տեղի համար պայքարում, որը Եվրո-2012-ի ուղեգիր է ապահովում:

«Ես կասեի, որ մեր բոլոր մրցակիցներից ամենաուժեղ թիմը Ռուսաստանինն է: Քչերն են կասկածում, որ նա կհասնի եզրափակիչ, սակայն նրա ճակատագիրը կախված կլինի մեզանից և այլ թիմերից: Թեև մենք ինքներս էլ պարտավոր ենք դուրս գալ Եվրոպայի առաջնության եզրափակիչ՝ անկախ այն բանից, թե կհայտնվի այնտեղ Ռուսաստանը, թե ոչ», - նշել է 24-ամյա մարզիկը:

Մակգիդին 2010 թ.-ի ամռանը «Սելթիկից» տեղափոխվել է «Սպարտակ»: Ֆուտբոլիստը խոստովանել է, որ ուրախ կլինի ռուսական ֆուտբոլի մասին իր գիտելիքները կիսել իռլանդացիների գլխավոր մարզիչ Ջովանի Տրապատոնիի հետ:

«Նա շատ փորձառու մարզիչ է: Ես հարյուր տոկոսով համոզված եմ, որ նա հաշվի կառնի իմ կարծիքը: Եթե նա ցանկանա ինչ-որ բան իմանալ, ապա ես, իհարկե, կասեմ: Սակայն հնարավոր է, որ նա ինձանից շատ բան գիտի ռուսական ֆուտբոլի մասին», - եզրափակել է Մակգիդին:

Իռլանդիայի հավաքականը մարտի 26-ին Դուբլինում կընդունի Մակեդոնիայի հավաքականին, որը 4 հանդիպումներում վաստակել է 4 միավոր:-0-