Հայաստանում ստեղծվել են սպորտի ոլորտի նվաճումների և զանգվածային սպորտի ցուցանիշների բարելավման պահպանման բոլոր նախադրյալները, կարծում է Հայաստանի սպորտի և երիտասարդության հարցերի նախարար Արթուր Պետրոսյանը։
«Կառավարությունը մեծ նշանակություն է տալիս ոլորտի զարգացմանն ու ֆինանսավորմանը։ Ամենից շատ ֆինանսավորվում են ծանրամարտի, ըմբշամարտի ֆեդերացիաները»,- չորեքշաբթի մամուլի ասուլիսի ընթացքում ասաց նախարարը։
Նրա խոսքով՝ 2011 թվականին առանձնացվել են նախարարության երեք գերակա խնդիրներ։ Ինչպես տեղեկացրեց Պետրոսյանը, առաջին գերակա խնդիրը մարմնամարզության և զանգվածային սպորտի ոլորտի ֆինանսավորման հայեցակարգի մշակումն ու ներկայացումն է, երկրորդը՝ «Մարզական լավագույն ընտանիքը» նախագահական մրցանակի մրցույթի կազմակերպումն ու անցկացումը, երրորդը՝ երիտասարդության շրջանում ուսումնասիրությունների անցկացումը երիտասարդական պետական քաղաքականության զարգացման առաջարկների մշակման նպատակով։
Նախարարը հայտնեց, որ մարմնամարզության և զանգվածային սպորտի զարգացման ֆինանսավորման հայեցակարգի մշակումը վաղուց է հասունացել։ Պետրոսյանի կարծիքով, հայեցակարգի բացակայությունը հանգեցնում է ոչ արդյունավետ ֆինանսավորման, ինչը բացասաբար է ազդում ոլորտի վրա ընդհանուր առմամբ։
«Հայեցակարգը պետք է առավելագույնս թափանցիկ, հասկանալի և ընդունելի լինի մեծամասնության համար։ Արդյունավետ և նպատակային ֆինանսավորումը կօժանդակի ոլորտի մրցունակության զարգացմանն ու բարձրացմանը։ Կազմակերպությունների ֆինանսավորումը կհատկացվի ձեռնարկած քայլերին և արդյունքներին համապատասխան։ Հայեցակարգի մշակման ժամանակ հաշվի կառնվի միջազգային փորձն ու օրենսդրությունը»,- ասաց սպորտի նախարարը։
Նախարարը տեղեկացրեց, ոչ Հայաստանի նախագահի մրցանակի մրցույթի անցկացումը նախարարության առավել հաջողված ծրագիր է, որը զանգվածային նախագիծ է դարձել Հայաստանում։ Նրա խոսքերով, մրցույթին մասնակցող ընտանիքների թիվը մշտապես աճում է, և 2010 թվականին 2009-ի համեմատ հասել է 347-ի։
Նախարարը հույս հայտնեց, որ 2011 թվականին սպորտային ընտանիքների թիվը կհասնի մինչև հազարի։
Երիտասարդության շրջանում երիտասարդական պետական քաղաքականության զարգացման առաջարկների մշակման նպատակով ուսումնասիրությունների անցկացման վերաբերյալ սպորտի նախարարը տեղեկացրեց, որ տվյալ ծրագիրը կիրականացվի երիտասարդության խնդիրների ազգային նոր զեկույցի մշակման միջոցով և հիշեցրեց, որ նմանատիպ վերջին ազգային զեկույցը մշակվել է 2006 թվականին։ -0-
