Վիկ Դարչինյանը որոշել է բողոքարկել իր վերջին մենամարտի արդյունքը. թերթ

Բռնցքամարտիկ Վիկ Դարչինյանը որոշել է բողոքարկել իր վերջին մրցամարտի արդյունքները, գրում է «Հայկական ժամանակ» թերթը: 

2010թ. դեկտեմբերի 12-ին Դարչինյանը պարտվել է Աբներ Մարեսին։ Երեք կողմնային դատավորներից երկուսը հաղթանակը Մարեսին են տվել, իսկ մեկը՝ Դարչինյանին։

Պարբերականին տված հարցազրույցում հայ բռնցքամարտիկի մարզիչ Վազգեն Բադալյանը բացատրել է նման որոշման պատճառները։ «Միանշանակ ճիշտ եմ համարում (մենամարտի արդյունքի) բողոքարկումը, և եթե գոնե որոշ արդարություն կա, ապա մենամարտի ելքը կվերանայվի»,- ասաց Բադալյանը։

Ըստ նրա` ողջ մենամարտի ընթացքում Դարչինյանի նկատմամբ ճնշում է գործադրվել, իսկ Մարեսը Դարչինյանին գոտկատեղից ցածր մոտ 14 անգամ հարված է հասցրել (պրոֆեսիոնալ բռնցքամարտի կանոններով` երեք նման հարվածներից հետո որակազրկում է արձանագրվում)։

Բադալյանը պատմեց, որ Դարչինյանի մենեջեր Էլիաս Նասերը կարողացել է գտնել Մարեսի մարզումների տեսագրությունը, որոնց վրա պարզ երևում է, որ ամերիկացին հատուկ կատարելագործում էր գոտկատեղից ցածր հարվածների տեխնիկան։

Այդ կադրերն արդեն ինտերնետում են և մեծ իրարանցում են առաջացրել բռնցքամարտի աշխարհում։ Բացի այդ, ռինգում դատավորն անընդհատ խանգարում էր հայ բռնցքամարտիկին և նկատողություններ էր անում։

Եթե Դարչինյան-Մարես մենամարտի ելքը վերանայվի, ապա հայը հաղթող չի ճանաչվի, նրան պարզապես կվերադարձնեն չեմպիոնական գոտին, և Վիկը կմենամարտի «Showtime» ընկերության կողմից կազմակերպած մրցաշարի եզրափակչում։

Մրցաշարի եզրափակչի մյուս հաղթող է դարձել բռնցքամարտիկ Ջոզեֆ Ագբեկոն։ -0-