Գերմանիայի դրոշի ներքո հանդես եկող հայազգի բռնցքամարտիկ Արթուր Աբրահամը, հնարավոր է, հրաժեշտ կտա իր մարզիչ Ուլի Վեգներին, գրում է «Հայոց աշխարհ» թերթը՝ հղում անելով գերմանական ԶԼՄ-ներին:
Թերթում նշվում է, որ համագործակցությունը դադարեցնելու նախաձեռնողը բռնցքամարտիկի մարզիչն է, ով վերջերս կոշտ քննադատության է ենթարկել Աբրահամին: Վեգների խոսքերով՝ բրիտանացի բռնցքամարտիկ Կարլ Ֆրոչից ջախջախիչ պարտությունից հետո Աբրահամը մեղադրում է բոլորին, բացի իրենից:
Մարզիչը կարծում է, որ եթե բռնցքամարտիկը համարժեք չգնահատի իրականությունը, չվերաիմաստավորի վերաբերմունքը թիմային սկզբունքների նկատմամբ և չընդունի սեփական թերությունները, ապա հետագա համագործակցությունը կիմաստազրկվի:
«Աբրահամն անչափ մեծ կարծիքի է իր մասին և ունակ չէ իրապես գնահատել սեփական հնարավորությունները: Նա փնտրում է միայն ուրիշների սխալները, մինչդեռ ավելի լավ կլիներ, որ անկեղծ լինի ինքն իր հետ», - ասել է Վեգները: Ըստ նրա՝ թիմին մեղադրելու փոխարեն, պետք է հնարավորինս արագ մոռանալ պարտությունների մասին և տրամադրվել ծանր աշխատանքի:
Նոյեմբերի 27-ին Հելսինկիում Super Six Boxing World Classic մրցաշարի շրջանակներում 33-ամյա բրիտանացի բռնցքամարտիկ Կարլ Ֆրոչը միավորների առավելությամբ հաղթանակ տարավ Աբրահամի նկատմամբ:-0-
