ՈՒԵՖԱ-ի վերահսկիչ-կարգապահական ատյանը (ՎԿԱ) ուրբաթ որոշում է ընդունել ութ տարով հեռացնել «Պոբեդա» մակեդոնական ֆուտբոլային ակումբին եվրագավաթների մասնակցությունից՝ սկսած 2009/10 սեզոնից, ասվում է ՈՒԵՖԱ-ի պաշտոնական կայքում հրապարակված տեղեկատվության մեջ։
Ակումբի նախագահ Ալեքսանդր Զաբրցանեցն ու ֆուտբոլիստ Նիկոլչե Զդրավեսկին ցմահ հեռացվել են ֆուտբոլային գործունեությունից, հաղորդում է ՈՒԵՖԱ-ի պաշտոնական կայքը։
Որակազրկումը կիրառվել է արդարության և մարզական պայքարի սկզբունքների խախտման, հատկապես, հանդիպման արդյունքի վրա ազդելու համար, որոնք ամրագրված են ՈՒԵՖԱ-ի կարգապահական կանոնադրության հինգերորդ հոդվածում։
ՈՒԵՖԱ-ն դիմել է նաև ՖԻՖԱ-ին՝ համաշխարհային մակարդակով այդ որոշումը հաստատելու խնդրանքով։
Կասկածի տակ է ընկել ՈՒԵՖԱ-ի Չեմպիոնների լիգայի ընտրական առաջին փուլի շրջանակներում կայացած «Պոբեդա»-«Փյունիկ» հանդիպումը, որը տեղի էր ունեցել 2004թ.-ի հուլիսի 13-ին և ավարտվել «Փյունիկի» հաղթանակով՝ 3։1 հաշվով։ Երևանում կայացած պատասխան հանդիպումը ավարտվել էր 1։1 հաշվով։ Մտավախություններն առաջացել էին վկաների ցուցմունքների և բուքմեյքերների տվյալների հիման վրա, որոնք կասկածելի խաղադրույքների ալիք էին արձանագրել։
ՈՒԵՖԱ-ի նախագահ Միշել Պլատինին ամբողջովին աջակցել է ՎԿԱ-ի որոշմանը։ «Ես ողջունում են ՎԿԱ-ի հստակ դիրքորոշումը՝ հստակ պատժել յուրաքանչյուր ակումբին կամ ֆիզիկական անձին, ովքեր ազդել են ֆուտբոլային հանդիպումների ելքի վրա», - հայտարարել է նա։
ՈՒԵՖԱ-ի նախագահը նաև ավելացրել է, որ «պատիժը հստակ և հզոր ազդանշանն է այն բանի, որ ՈՒԵՖԱ-ն թույլ չի տա խաղերի արդյունքներին ուղղված որևէ խարդախ գործունեություն»։
«Ոչ ոք չպետք է կասկածի, որ ՈՒԵՖԱ-ն առավելագույն ջանքեր կգործադրի, որպեսզի ֆուտբոլային հանդիպումները Եվրոպայում ազնիվ լինեն։ Այս ամենի համար կձեռնարկվեն անհրաժեշտ բոլոր միջոցները», - ընդգծել է Պլատինին։-0-
