Էստոնիայի ֆուտբոլի ազգային հավաքականի գլխավոր մարզիչ Տարմո Ռյույուտլին հայտարարել է, որ իրեն ոչ-ոքին էլ կբավարարի 2010թ.-ի աշխարհի առաջնության Հայաստանի հավաքականի հետ նախընտրական խաղում, որը կկայանա Երևանում մարտի 28-ին:
«Հայաստանի հետ առաջիկա երկու խաղում մենք հանդես ենք գալու սովորական ֆուտբոլային մարտավարությամբ՝ ոչ-ոքի՝ արտագնա խաղում և հաղթանակ՝ մեր հարկի տակ»,- հայտարարեց նա։
Հայաստան-Էստոնիա հանդիպումը տեղի կունենա Երևանում մարտի 28-ին, Երևանի ժամանակով ժամը 20։00-ին (Մոսկվայի ժամանակով 19։00-ին) Վազգեն Սարգսյանի անվան հանրապետական մարզադաշտում։ Պատասխան հանդիպումը տեղի կունենա ապրիլի 1-ին Երևանի ժամանակով ժամը 20։00-ին Տալլինի «Ա Լե Կոկ» մարզադաշտում։
Էստոնացիների մարզչի կարծիքով, Հայաստանը խաղալու է միմիայն հաղթանակի համար՝ փորձելով միավորներ հավաքել, քանի որ մինչ այդ բոլոր չորս հանդիպումներում Հայաստանի հավաքականը պարտություն է կրել։
Ռյույուտլին ընդգծեց, որ չնայած հայ ֆուտբոլիստներն իրենց տեխնիկայով գերազանցում են էստոնացիներին, սակայն իր խաղացողներն էլ իրենց առավելություններն ունեն։
Նրա խոսքերով, Էստոնիայի հավաքականի կազմում առաջիկա հանդիպումից առաջ միակ կորուստը թիմի լավագույն հարձակվող Անդրեաս Օպերն է, ով հանդես է գալիս հոլանդական «Ռոդա» ակումբում։ «Նրանից բացի, մյուս բոլոր խաղացողներն առողջ են ու պատրաստ Հայաստանի հետ հանդիպմանը»,- ասաց մարզիչը։
Ռյույուտլին նշեց նաև, որ և Էստոնիայի, և Հայաստանի հավաքականներն արդեն զրկվել են խմբից դուրս գալու հնարավորությունից, և խմբից դուրս գալու հիմնական պայքարը կծավալվի Իսպանիայի, Թուրքիայի, Բելգիայի և Բոսնիայի միջև։
Հանդիպման ավարտին Ռյույուտլին անդրադարձավ փոքր երկրներում ֆուտբոլի զարգացման խնդրին՝ նշելով, որ նման երկրներում ուժեղ ազգային հավաքականներ կազմելը հնարավոր է միայն արտասահմանյան լուրջ առաջնություններում առաջատար խաղացողերի մասնակցության շնորհիվ։
Նրա խոսքրով, այժմ Էստոնիայում շեշտը դրվում է մանկապատանեկան ֆուտբոլի զարգացման վրա։
Հայաստանի և Էստոնիայի հավաքականները ներառված են աշխարհի առաջնության հինգերորդ ընտրական խմբում։ Նրանց մրցակիցներն են Բոսնիա և Հերցոգովինայի, Բելգիայի, Իսպանիայի և Թուրքիայի թիմերը։ Խմբի առաջատարը Իսպանիան է՝ 12 միավորով։-0-
