Արոնյանը Լինարեսի գերմրցաշարում աշխարհի չեմպիոն Անանդի հետ կիսում է 4-5 տեղերը

Իսպանիայի Լինարես քաղաքում անցկացվող շախմատային գերմրցաշարի 12-րդ փուլից հետո հայ գրոսմայստեր Լևոն Արոնյանը աշխարհի չեմպիոն Վիշվանաթան Անանդի հետ կիսում է 4-5-րդ տեղերը։

12-րդ փուլի հանդիպման ժամանակ Արոնյանը սպիտակ խաղաքարերով չի կարողացել հաղթել Վան Յուեին (Չինաստան)։ Հանդիպման 31-րդ քայլի ժամանակ մրցակիցները համաձայնվել են ոչ-ոքիի։ Մրցաշարի ընթացքում առաջին պարտությունն է կրել մրցաշարի առաջնորդ Ալեքսանդր Գրիշչուկը (Ռուսաստան)։ Նա սև խաղաքարերով զիջել է նորվեգացի Մագնուս Կառլսենին։

12-րդ փուլի մյուս հանդիպումներն ավարտվել են ոչ-ոքի հաշվով։ Հաղթող չի եղել նաև Իվանչուկ-Անանդ և Ռաջաբով-Դոմինգես հանդիպումների արդյունքում։

Գերմրցաշարի ավարտից երկու փուլ առաջ Գրիշչուկը (Ռուսաստան) ունի 7 միավոր, 2-3 տեղերը 6,5-ական միավորով կիսում են Իվանչուկը (Ուկրաինա) և Կառլսենը (Նորվեգիա), 4-5 տեղերը 6-ական միավորով կիսում են Արոնյանն ու Անանդը (Հնդկաստան), 6-7 տեղերը 5,5-ական միավորով՝ Ռաջաբովը (Ադրբեջան) և Վան Յուեն (Չինաստան), 5 միավորով վերջին՝ ութերորդ տեղում է Դոմինգեսը։-0-