Վախթանգ Դարչինյանը ցանկանում է հաջորդ մենամարտն անցկացնել մայիսին և առավել ծանր քաշային կարգում

ԵՐԵՎԱՆ, 10 փետրվարի. /Նովոստի-Արմենիա/. IBF, WBA, WBC վարկածներով երկրորդ գերթեթև քաշային կարգում աշխարհի չեմպիոն հայ բռնցքամարտիկ Վախթանգ (Վիկ) Դարչինյանը ծրագրում է իր հաջորդ մենամարտն անցկացնել մայիսին և առավել ծանր քաշային կարգում, հաղորդում է allboxing.ru կայքը։

«Ցանկանում եմ չեմպիոն դառնալ երեք, չորս և նույնիսկ հինգ քաշային կարգերում։ Այդ պատճառով մտադիր չեմ կանգ առնել՝ դառնալով լավագույնը երկու գերթեթև քաշային կարգերում։ Անշուշտ, ես ներառված են աշխարհի Լավագույն բռնցքամարտիկների տասնյակում՝ անկախ քաշային կարգից, այժմ ինձ պետք է որքան հնարավոր է մոտենալ առաջին համարին», - հայտարարել է Դարչինյանը։

Չեմպիոնի մենեջեր Էլիաս Նասսարը տեղեկացրել է, որ ուզում է Վիկի մենամարտը կազմակերպել թեթև քաշային կարգում WBC վարկածով չեմպիոն Խոցումի Խասեգավայի հետ կամ նույն քաշային կարգում IBF վարկածով տիտղոսակիր Ջոզեֆ Ագբեկոյի հետ։ Նման մենամարտը կարող է տեղի ունենալ մայիսից ոչ շուտ, քանի որ Դարչինյանից կպահանջվի 60 օրից ոչ քիչ, որպեսզի վերականգնվեն Խորխե Արսեի դեմ մենամարտում ստացված վնասվածքները։

Միաժամանակ առաջին թեթև քաշային կարգում WBO վարկածով չեմպիոն Ֆերնանդո Մոնտելը Վախթանգ Դարչինյանի հետ մենամարտելու պատրաստակամություն է հայտնել՝ բոլոր չորս հիմնական կազմակերպությունների գոտիները սեփական ձեռքերում միավորելու համար։

«Ես միշտ կարծել եմ, որ նա կհաղթի Արսեին, - հայտարարել է Մոնտելը, - այժմ, երբ այդ հաղթանակը ձեռք է բերվել, և նա իրեն որպես մեքսիկացիների դահիճ է զգում, նա կարող է մենամարտել ինձ հետ՝ չեմպիոնը չեմպիոնի դեմ»։

Իր հաջորդ մենամարտը Ֆերնանդո Մոնտելը կանցկացնի մարտի 28-ին՝ թեթև քաշային կարգի շրջանակներում. նա ուժերը կչափի Էրիկ Մորելի հետ՝ մինչև 53,5 կգ քաշային կարգում WBO վարկածով ժամանակավոր չեմպիոնի թափուր գոտու համար։ Հաղթանակի դեպքում և այդ քաշային կարգում WBO վարկածով չեմպիոն Ջերի Պենալոսայի՝ հաջորդ քաշային կատեգորիա անցնելու դեպքում Մոնտելը կարող է հանդիպել Դարչինյանի հետ նաև թեթև քաշային կարգի շրջանակներում։

Վախթանգ Դարչինյանի հետ մենամարտելու իր պատրաստակամության մասին հայտարարել է նաև առաջին կիսաթեթև քաշային կարգում (55,3 կգ) WBC վարկածով չեմպիոն Իսրայել Վասկեսը, ում հայ բռնցքամարտիկը բազմաթիվ անգամ համարում էր ցանկալի մրցակից։ «Ես անխոս շահագրգռված եմ մենամարտել Վիկի հետ, - նշել է Վասկեսը, - Վիկը հոյակապ բռնցքամարտիկ է։ Նա ուժեղ է, իսկապես արժանի է չեմպիոնի կոչմանը, և ես սպասում եմ այդ մենամարտին։ Եթե ստացվի այն կազմակերպել, մենք պետք է հանդիպենք»։-0-