Զլատան Իբրահիմովիչը Իտալիայի 2008 թ.-ի լավագույն ֆուտբոլիստ է ճանաչվել

Շվեդիայի ազգային հավաքականի և Միլանի «Ինտերի» հարձակվող Զլատան Իբրահիմովիչը Իտալիայի 2008 թ.-ի լավագույն ֆուտբոլիստ է ճանաչվել, հայտնում են իտալական ԶԼՄ-ները։  

Իբրահիմովիչը Ֆուտբոլիստների իտալական ասոցիացիայի ամենամյա մրցանակաբաշխության երեք «Օսկարի» է արժանացել՝ հաղթելով «Լավագույն արտասահմանցի ֆուտբոլիստ», «Լավագույն խաղացող» և «Տարվա լավագույն գոլ» անվանակարգերում։

Թուրինյան «Յուվենտուսի» ավագ Ալեսանդրո դել Պիերոն «Լավագույն իտալացի խաղացող» է ճանաչվել, նրա թիմակից Ջորջիո Կիելինին և Ջանլուիջի Բուֆոնը՝ համապատասխանաբար «Լավագույն պաշտպան» և «Լավագույն դարպասապահ»։

«Նապոլիի» կիսապաշտպան Մարեկ Գամշիկը «Լավագույն երիտասարդ խաղացող» տիտղոսին է արժանացել, իսկ «Ֆիորենտինայի» մարզիչ Չեզարե Պրանդելին՝ «Լավագույն մարզիչ։ 

Դափնեկիրները որոշվում են քվեարկության միջոցով իտալական Ա սերիայի ֆուտբոլիստների շրջանում։ --0--