Ֆուտբոլի միջազգային ֆեդերացիայի (ՖԻՖԱ) վարկածով 2008 թ.-ի լավագույն ֆուտբոլիստի և լավագույն ֆուտբոլիստուհու անունները կհրապարակվեն երկուշաբթի՝ Ցյուրիխի օպերայի շենքում կայանալիք հատուկ գալա-արարողության ընթացքում։
Արդյունքներն ամփոփվում են ՖԻՖԱ-ի անդամ-երկրների ազգային հավաքականների գլխավոր մարզիչների և ավագների շրջանում անցկացված հարցման արդյունքներով։
Այս տարի տղամարդկանց շրջանում հավանական հաղթողների թվում են բրազիլացի Կական՝ «Միլանից», ինչպես նաև արգենտինացի Լիոնել Մեսսին («Բարսելոնա»), պորտուգալացի Կրիշտիանու Ռոնալդուն («Մանչեսթեր Յունայթեդ»), իսպանացիներ Ֆերնանդո Տոռեսը («Լիվերպուլ») և Խավին («Բարսելոնա»)։
Հավանականությունը քիչ է, որ կրկնվի Կակայի անցած տարվա հաջողությունը, քանի որ այս փայլուն հնգյակում նա միակն է, ում թիմը 2008 թ.-ին հաջողությունների չի հասել միջազգային ասպարեզում։
Այսպես, Կրիշտիանու Ռոնալդուն Չեմպիոնների լիգայի և աշխարհի ակումբային առաջնության գործող հաղթողն է, Մեսին 2008 թ.-ին Արգենտինայի հավաքականի կազմում Պեկինի Օլիմպիական խաղերի ոսկի է նվաճել, իսկ իսպանացիների զույգը իրենց ազգային հավաքականի հետ դարձել են Եվրո-2008 թ.-ի հերոսներ։
Տարվա լավագույն ֆուտբոլիստի ընտրությունը կանցկացվի 18-րդ անգամ։ Առաջին անգամ այս կոչմանը հավակնում են միանգամից հինգ ֆուտբոլիստներ, ավելի վաղ ՖԻՖԱ-ն նախօրոք որոշում էր միայն երեք թեկնածուի։
1991 թ.-ին առաջինը լավագույնների ցանկում դարձավ գերմանացի Լոտար Մատթեուսը։ Այդ ժամանակից ի վեր արարողության ամենահաջողակ մասնակիցներն էին բրազիլացիները. այս երկրի ֆուտլբոիստները, ռեկորդ սահմանելով, ՖԻՖԱ-ի կողմից լավագույնն են ճանաչվել ութ անգամ՝ Ռոնալդո (1996, 1997, 2002), Ռոնալդինիո (2004, 2005), Ռոմարիո (1994), Ռիվալդո (1999) և Կակա (2007)։ Երեք անգամ տիտղոսը բաժին է ընկել ֆրանսիացի Զինեդին Զիդանին (1998, 2000, 2003)։
Տարվա լավագույն ֆուտբոլիստուհու կոչումը շնորհվում է ութերորդ անգամ։ Այս տարի հավանական հաղթողների հնգյակում են Բրազիլիայի երկու ներկայացուցիչներ Մարթան և Կրիշտիանեն, Գերմանիան ներկայացնող երկու ֆուտբոլիստուհիներ Բիրգիտ Պրինցն ու Նադին Անգերերը, ինչպես նաև անգլուհի Քելլի Սմիթը։ Անցած երկու տարվա ընթացքում լավագույնն է ճանաչվել Մարթան, իսկ 2003-2005 թթ.-ին ֆուտբոլային գահին գահակալում էր Պրինցը, երկու առաջին տիտղոսները (2001, 2002) բաժին են ընկել ամերիկուհի Միե Հեմմիին։ Արարողությունը սկսվում է Երևանի ժամանակով ժամը 18։00-ին։-0-
