Հայաստանի շախմատի տղամարդկանց հավաքականը, յոթերորդ փուլի արդյունքներով, միանձնյա առաջատարն է Դրեզդենում անցկացվող Շախմատի համաշխարհային օլիմպիադայում։
Ինչպես ուրբաթ «Նովոստի-Արմենիա» գործակալությանը տեղեկացրեցին ՀՀ շախմատի ֆեդերացիայից, հայ շախմատիստները զբաղեցրել են մրցաշարային աղյուսակի առաջին հորիզոնականը՝ նախօրեին 2,5։1,5 հաշվով հաղթանակ տանելով Ռուսաստանի հավաքականի նկատմամբ։
Լևոն Արոնյանը, Վլադիմիր Հակոբյանն ու Տիգրան Լ. Պետրոսյանը ոչ-ոքի են խաղացել ռուս շախմատիստներ Վլադիմիր Կրամնիկի, Պյոտր Սվիդլերի և Յակովենկոյի հետ։ Գաբրիել Սարգսյանը հաղթանակ է տարել Ալեքսանդր Գրիշչուկի նկատմամբ։
Հայկական հավաքականը 13 միավորով գլխավորում Օլիմպիադան։ 12 միավորով 2-4-րդ տեղերը կիսում են Գերմանիա-1-ը, Իսրայելը, Ֆրանսիան։ Ռուսաստանը, Ուկրաինան, Չինաստանը, Վիետնամը, ԱՄՆ-ն 11 միավորով կիսում են 5-9-րդ տեղերը։
10-24-րդ տեղերը զբաղեցնում են Ադրբեջանը, Բուլղարիան, Վրաստանը, Հունաստանը, Լեհաստանը, Հնդկաստանը, Ռումինիան, Սերբիան, Սլովենիան, Թուրքիան, Անգլիան, Սլովակիան, Բելառուսը, Խորվաթիան, Նոր Զելանդիան, որոնք հավաքել են տասը միավոր։
Ութերորդ փուլում հայ շախմատիստները ուժերը կչափեն Ֆրանսիայի հավաքականի հետ։
Շախմատի համաշխարհային օլիմպիադան անցկացվում է 2008 թ.-ի նոյեմբերի 12-ից 25-ը Դրեզդենում (Գերմանիա)։
Հայաստանի տղամարդկանց հավաքականը գործող օլիմպիական չեմպիոնն է։ Տղամարդկանց հավաքականի կազմում են գրոսմայստերներ Լևոն Արոնյանը, Վլադիմիր Հակոբյանը, Գաբրիել Սարգսյանը, Արտաշես Մինասյանն ու Տիգրան Լ. Պետրոսյանը։-0-
